Transformasyen SOE Sarawak Disadang Ngurang Kelalu Bepanggai Ba Geran Perintah RM403 Juta
KUCHING: Program Transformasyen Kompeni Enggi Perintah Sarawak (SOE) disadang ulih ngurangka pengawa kelalu bepanggai ba geran operasyen perintah sepenyampau RM403 juta ba taun 2030 ila.
Tu deka ngenegapka pekara wang nengeri alai mayuh agi agih ulih dikena ngaga projek pemansang ungkup rayat.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pekara nya nyadi bepun ari pengawa numbuh Program Transformasyen SOE Sarawak ke benung digaga enggau chara berenggat.
"Ba taun 2030, program tu disadang ulih ngurangka agi guna geran operasyen urung RM403 juta.
"Duit nya ulih dikalihka kitai dikena ngaga projek baka ngadu jalai menua pesisir, sekula enggau pemansang infrastruktur ti bela deka meransang pengerembai ekonomi ba selampur Sarawak," pia ku iya.
Iya bejaku munyi nya ba program ‘Sarawak SOEs Transformation Programme: A Pledge fo Good Governance, High Performance and Value Creation' ditu, Hari Empat.
Nambah ke jaku iya, Premier Sarawak madah, ba pansik ke dipejalai ba 36 entiti ari 'badan berkanun' enggau kompeni bekaul perintah (GLC) agi bisi organisasyen bepanggai ba bantu perintah dikena sida bejalaika pengawa.
Ku iya, geran perintah naka ke diatu nyaup urung satu pertiga ari penyampau penatai pemisi beberapa 'badan berkanun' lalu urung 44 peratus belanja operasyen sida datai ari geran operasyen perintah.
Berebak enggau nya, iya madah, tikas pengulih wang SOE Nengeri mandangka pemutus manah alai penguntung semua entiti nambah antara taun 2023 nyentuk 2024.
Ukai semina nya ku iya, kompeni ari baruh Sekretari Pekara Wang Sarawak bela ngerikod nyauka 58 peratus lalu kompeni bekaul 'badan berkanun' bela nambah 44 peratus maya sida madahka penyampau dividen.
Bela datai maya nya Sapit Premier Sarawak, Premier Sarawak Datuk Amar Douglas Uggah Embas enggau Datuk Amar Profesor Dr. Sim Kui Hian, ex-Sapit Kepala Menteri Sarawak Tan Sri Datuk Patinggi Dr. George Chan Hong Nam, Menteri Industri Pemakai, Komoditi enggau Pemansang Kandang Menua Sarawak Dato Sri Dr. Stephen Rundi Utom, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, Menteri ba Opis Premier Sarawak Dato Sri John Sikie Tayai, Menteri Utiliti enggau Telekomunikasyen Sarawak Dato Sri Julaihi Narawi, Sekretari Perintah Sarawak Datuk Amar Mohamad Abu Bakar Marzuki, Sekretari Pekara Wang Sarawak Dato Sri Dr. Wan Lizozman Wan Omar, raban Sapit Menteri Sarawak enggau bala Tuai Opis Perintah.-EDISI UKAS
