KUCHING: Inovasyen Opis Menteri Pengeraja Asal enggau Pemansang Mengeri Sarawak (MUDeNR) ke ditengkebang nengah platform Konvensyen Kumpulan Inovatif dan Kreatif (KIK) matak perati bala mayuh maya Aum Kaunsil Tanah Menua.

Sapit Premier Sarawak, Datuk Amar Awang Tengah Ali Hasan madah, pemujur nya ukai semina ulih nyaup nyungkak pemujur ngaga projek enggau program perintah tang bela dibasa ba renggat antarabansa, nasional enggau nengeri.

"Sebagi ari pemujur ba KIK ke udah dikena nyungkakka agi pengawa ngenataika servis gawa iya nya sistem eSPA enggau inisiatif ‘Same Day Registration’ udah bisi setipikit ISO kelimpah beberapa bengkah intervensyen ke bukai baka sistem matau pengawa nyukat tanah enggau ngena tanah ke digagaka pemansang.

"Semua tu bepun ari inovasyen ke dikemeran nengah KIK lalu maya aku ngulu Aum Kaunsil Tanah Menua ti betuaika Menteri Besai, mayuh tekait ati maya madahka Sarawak udah mujur nyungkakka tikas pemanah ngenataika servis nyentuk pengawa ngerejista tanah pan ulih digaga dalam kandang sehari aja," pia ku iya.

Iya bejaku munyi nya ba Pengerami Nutup Konvensyen KIK 2026 ditu, Hari Empat.

Iya ke mega Menteri Pengeraja Asal enggau Pemansang Mengeri II Sarawak bela mandangka pemujur inovasyen SaraPeg ke digaga Opis Tanah enggau Survei Sarawak.

"Tu inovasyen ti patut dikemegahka kitai semua," pia ku iya.

Datuk Amar Awang Tengah madah, pemujur nya ngelai kreativiti enggau pengeransing orang kereja perintah deka ngubah chara gawa nyadi manah agi seraya ngenegapka penuduk Sarawak nyadi menua nyulut ba inovasyen kereja perintah di Malaysia.

Pengerami maya nya bela digulu Sapit Menteri Pengatur Mengeri, Tanah enggau Rampa Menua Datuk Len Talif Salleh sereta bala pemesai ke bukai. -EDISI UKAS