KUCHING: Perintah Sarawak besaup enggau Agensi Pengatur Penusah Ngenyit Menua (NADMA) berengkah bejalaika pengawa menih remang dikena nambah tikas peninggi ai ba tekat ai enggau palan nimbun ai ti bepenanggul ketegal kemarau nyadi di nengeri tu.
Sapit Premier Sarawak ke mega Chairman Komiti Pengatur Penusah Ngenyit Nengeri Sarawak (JPBNS) Datuk Amar Douglas Uggah Embas madah, pengawa nya diatur bepun ari ripot madahka tikas ai majak langkang ba beberapa bengkah tekat ai lalu bisi mega endur ti napi penanggul suntuk bekal ai.
Ku iya, pengawa nya berengkah diatur sehari tu nyentuk Hari Minggu tu ba Tekat Batang Ai di Lubok Antu, Tekat Ai Bakun enggau Murum di Belaga, Tekat Ai Bengoh, Matang, Simunjan enggau Gerugu.
"Kami ngarapka pengawa tu mujur ngambika penanggul bekal ai ulih diputarka.
"Tu mega dipejalai ketegal diatu benung kemarau," ku iya ba aum media ditu, Hari Lima.
Iya madah, pengawa keterubah diatur bulan Mei tu tadi lalu mujur nambah tikas ai di Tekat Batang Ai tang penusah nya bela nyadi ba Tekat Ai Bakun.
Ku iya, tikas peninggi ai ba Tekat Batang Ai, Bakun enggau Murum enda tau bepenanggul ketegal nyadi pun bekal karan di Sarawak.
Datuk Amar Douglas mega madah, pengawa ke sekali tu bela diatur ba palan nimbun ai dikena nambah bekal ai selampur nengeri.
Bela datai ba aum media nya, Sapit Sekretari Perintah Sarawak (Adminstresyen) ke mega Sapit Chairman JPBNS Datu Felicia Tan Ya Hua. -EDISI UKAS
