Peminta Nampung Pelajar Program Perubat UNIMAS Majak Nambah
KUCHING: Program perubat ba Universiti Malaysia Sarawak (UNIMAS) meruan mayuh dipinta tang penyampau nembiak ke ulih nerima Sekulasip Khas Program Perubat Yayasan Sarawak mengkang betatak ketegal atur ke udah ditetapka.
Sapit Menteri Pelajar, Inovasyen enggau Pemansang Pengelandik Sarawak, Datuk Dr Annuar Rapaee madah, sekulasip nya ukai diberi automatik tang sida ke minta meseti nitih atur.
Ku iya, taun siti suba, bisi 105 ari 150 iku nembiak ke diterima belajar ba program perubat UNIMAS endang peranak Sarawak ti mandangka pengerindu ba pelajar nya.
"Yayasan Sarawak bisi geran khas ungkup nembiak ngambi pelajar perubat Sarawak tang penyampau sida ke ulih nerima bantu nya enda mayuh ketegal bisi atur ti patut dititih," pia ku iya.
Iya nerangka pekara nya ba aum media mantai pemutus STPM 2025 ditu, Hari Lima.
Datuk Annuar mega madah, pengawa interbiu ngambi program perubat UNIMAS ungkup taun tu agi dipejalaika lalu penyampau nembiak Sarawak ke ngambi pelajar nya empai ditemu.
Iya madah, insiatif nya siti ari pengeransing Perintah Sarawak nyaup mayuh agi nembiak nengeri tu nampung pelajar ba bidang perubat sereta nipak peminta gawa pengerai di Sarawak.-EDISI UKAS
