KUCHING: Komiti Pengatur Penusah Ngenyit Nengeri Sarawak (JPBNS) udah minta semua komiti ba renggat sitak enggau pelilih menua nyikap diri napi penusah besebun enggau penusah babas angus bepun ari musim kemarau ke disadang majak nyadi.
Sapit Premier Sarawak ke mega Chairman JPBNS Datuk Amar Douglas Uggah Embas madah, gaya hari angat ngujungka pemayuh 'hotspot' majak nambah lalu tau ngasuh penusah babas angus nyadi.
Ku iya, Tikas Pengamah Angin (IPU) deka terus diperati lalu pengawa bekaul deka diatur bepelasarka atur operasyen standard (SOP).
"Kitai udah minta semua komiti ba sitak menua ti betuaika Residen enggau ba renggat pelilih menua betuaika Pegawai Pelilih Menua berengkah nyikap diri.
"Sekeda ari pekara dikemeratka iya nya endur ti mudah angus," pia ku iya ba aum media ditu, Hari Lima.
Iya mega madah, endur ke mudah angus nya nyengkaum di Kuala Baram ti suah napi penusah angus ba tanah kerapa maya musim kemarau.
Ku iya, perintah nengeri udah nyendiaka macham infrastruktur sukung baka telaga, tekat ai mit enggau palan matau dikena ngatur pengawa ke patut dulu nyema bisi penusah angus nyadi.
Kelimpah ari nya, iya madah, kerejasama enggau sida ke beempu tanah meseti bisi ngambika penusah ulih diputar enggau lengkas.
Datuk Amar Douglas madah, Opis Rampa Menua (JAS) enggau Kaunsil Pengeraja Asal enggau Rampa Menua (NREB) bela udah dipinta ngena dron matau tanah kerapa ke mudah alai penusah nyadi.-EDISI UKAS
