76 Penerima Di DUN Stakan Nerima Cek Outright Grant Sepenyampau RM313,000
KOTA SAMARAHAN: Bisi 76 penerima ba Kunsil Nengeri (DUN) Stakan nerima ‘outright grant’ nengah agih belanja sepenyampau RM313,000.
Kaban Kunsil Nengeri (ADUN) Stakan, Datuk Hamzah Brahim madah, agih belanja nya diagih ngagai Komiti Pemansang enggau Pengelikun Genturung Pendiau (JKKK), serakup, kelab sereta gerempung ti ransing ngatur bemacham program enggau aktiviti ngaul komuniti ba DUN Stakan.
Berebak enggau nya, iya nyemetak madah ke tiap belanja ti diterima meseti dikena manah, integriti enggau bisi tanggungpengawa nentuka pemaik nya ulih diasai ke komuniti.
Iya madah munyi nya ba Pengawa Nyua Chek ‘Outright Grant’ 2026, di Palan Servis DUN Stakan kena Hari Enam.
Iya mega ngingatka semua penerima nentuka tetiap pengawa ngena agih belanja ditetapka begulai nengah aum sereta dipesetuju kaban komiti ti bekaul nentuka atur pengawa ti manah dikemeran.
Ku iya, tetiap pemutus meseti dirikod enggau manah nengah minit aum sereta ripot betulis nentuka atur belanja semampai lurus, berurun enggau nitih ke atur ti ditetap.
Bela datai, Pegawai Pelilih Samarahan Ahmad Abdul Razak, Sapit Chairman Kaunsil Mengeri Kota Samarahan (MPKS) Daily Joseph sereta Sapit Tuai Parti Pesaka Bumiputera Bersatu (PBB) Pampang Stakan Tuah Jini. -EDISI UKAS
