KUCHING: Perintah Sarawak meruan chakah nyendiaka akses ngagai pengawa ulih beempu rumah nengah program ke ukai semina nyendiaka rumah manah tang nyamin pengelantang pengidup rayat lebih agi raban B40 enggau bepenatai pemisi mit.
Sapit Premier Sarawak Datuk Amar Profesor Dr Sim Kui Hian madah, Opis Pemansang Pengawa Berumah (HDC) semampai bejadika juluk ati Perintah Sarawak nyendiaka rumah ulih diempu ba tuju nyungkakka pengelantang pengidup rayat mayuh.
"Sekeda ari inisiatif tu iya nya nengah Program Pengawa Berumah Rakyat (PPR) ti dikena nyaup pengelantang rayat," pia ku iya.
Iya madah munyi nya nengah teks jaku ke dibacha Sapit Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Michael Tiang Ming Tee ba Pengerami Ngiling Bidai HDC 2026 ditu, Hari Dua.
Iya mega madah, seriris enggau pemayuh peminta, pengawa mansik penyuwa diatur ba semua skim PPR ke dipejalai HDC selampur Sarawak dikena nentuka bantu perintah nya diberi ngagai sida ke endang begunaka bantu.
"Pansik tu digaga bepelasarka timpuh nyuwa, penatai pemisi ruang bilik, rikod bayar sereta pekara bekaul pengidup.
“Tu mandangka pengeransing perintah nentuka bantu nya ulih datai ba tuju ke bendar," ku iya madah baru.
Kelimpah ari nya, iya madahka Sarawak meruan puh sereta ngembuan pengandal betapi enggau penguji global nyengkaum bekaul ekonomi sereta ubah klimet nengah pemansang ke mujur ditempa ba sektor infrastruktur, energi ulih dikena baru, pengerai, pelajar enggau pengawa berumah.
Bekaul pengerami nya, iya madah, perengerami nya ukai semina ngelai nutup Gawai Dayak tang nyadi pelasar ngenegap penyerakup, besepenemu sereta bebasaka pangan diri enda ngira bansa enggau jalai pengidup.
Ku iya, pengelantang ke diasai maya tu bepun ari ulah bebebasa ke bela nyadi pugu pengelantang enggau pemansang nengeri.
"Tu meseti ditanka laban tu nyadi reta ke pemadu berega dikena kitai nentuka pemansang bela diasai genap iku rayat," ku iya madah baru.
Bela datai ba pengerami nya Chairman HDC Abdul Yakub Arbi, Tuai Pegawai Eksekutif HDC Fathi Hambali, Tuai Pegawai Eksekutif Mutiara Mortgage & Credit Sdn. Bhd. Awang Irwan Awang Shawal, Tuai Gawai David Gawan sereta bala bukai. - EDISI UKAS
