KUCHING: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi datai ngerichah pengerami nutup Sarawak International Choral Festival & Symposium (SICFest & Sym) 2026 ke diatur ditu, Hari Minggu tu tadi.
Pemujur ngatur pengerami nya ngelai siti agi pemujur festival koir antarabansa ti ngempuru pengemeran seni ari macham bengkah menua.
Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah ba jaku iya madah, Perintah Sarawak semampai nyungkup pemansang seni enggau budaya sereta program betikas antarabansa ke ulih nyaup pemansang dagang temuai, budaya enggau pengelandik.
Nangkan nya, komiti pengatur madah, pengerami taun tu mujur digulu lebih 1,200 penyereta ari enam buah menua iya nya Amerika Syarikat, Thailand, Singapura, Filipina, Indonesia enggau Malaysia.
Pengerami nya bela nyadi pelasar mandang penyulut seni, pelajar muzik, penemu budaya enggau kaul antarabansa nengah jaku universal muzik.
Mensia mayuh ke bisi datai bela beperindang enggau KCS Festival Choir ari penanyi macham bansa, umur enggau menua ti ngelai penyerakup meruan nyadi pengering ngatur pengerami nya.
Ba pengerami nya, Trofi SICFest Golden Kenyalang Grand Prix bisi dipandang ti ngelai basa ke chukup besai pengerami ti dikemujur tujuh raban koir ari Malaysia, Indonesia enggau Filipina ke pemadu nyulut ba pengerami serak tu.
Bala finalis bela nerima setipit sebedau trofi SICFest Golden Kenyalang Grand Prix disua ngagai champion.-EDISI UKAS
