SIBU: Pengulih Perintah Sarawak mayar RM1.8 bilion dikena ngambi penyangkai kapal bintulu ari perintah besai kelai pengering enggau penegap chara ngatur, integriti sereta pemujur mutar belanja nengeri.

Sapit Menteri Ba Opis Premier Sarawak (Integriti enggau Ombudsman), Datuk Dr Juanda Jaya madah, pemujur sarawak ngambi baru aset nya ukai semina mandangka penegap pekara wang nengeri tang bela ngelai pemujur ngemeran ulah akauntabiliti.

"Empai lama tu tadi Perintah Sarawak mayar RM1.8 bilion dikena ngambi penyangkai kapal. Tu penyampau ke chukup mayuh.

"Nama kebuah kitai ulih mayar? Laban kitai bisi integriti, laban kitai mujur ngatur belanja. Kitai bisi akauntabiliti.

"Kitai bisi duit alai kitai enda nanggi orang meresa akaun kitai, baka ni kitai melanja duit lalu baka ni duit nya dipelanja," pia ku iya.

Iya bejaku munyi nya maya bejadika Kus Modul Integriti Iringtuai Rayat (MIKM) Tikas 2 Renggat 8 enggau Tikas 3 Renggat 2 Bagi Zon Tengah Taun 2026 ditu, Hari Dua tu tadi.

Datuk Dr Juanda madah, integriti nyadi pugu ngagai pemujur sesebengkah nengeri ketegal pemansang ekonomi enggau pengaya enda ulih pulaika pemaik nyema enda disukung tuai ti manah gawa.

Nya alai, iya ngelalau bala Tuai Raban Bansa enggau Genturung Pendiau (KMKK) semampai ngemeranka ulah integriti maya sida bejalaika pengawa ungkup rayat mayuh.

Ketegal nya, iya mega madah, program baka MIKM beguna dikena nyungkak penemu bekaul chara iringtuai ti manah sereta ngemeran akauntabiliti ba tiap iku tuai raban bansa.-EDISI UKAS