Pengelain Pengarap, Budaya Enggau Tirai Juru Nyadi Pengering Sarawak
KUCHING: Pengelain pengarap, budaya enggau tirai juru raban bansa nyadi pun pengering ke ngempung rayat Sarawak nempa nengeri ke likun enggau lantang.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Haji Openg madah, rayat Sarawak enda ibuh megai pengarap enggau penemu ke sama ngambi seruran begempung, tang patut bebasa enggau segulai sejalai ngagai tuju ke sama.
Ku iya, Sarawak nyadi bilik penaik ke datai ari pupu raban bansa, pengarap, budaya enggau tirai juru, enggau identiti anak Sarawak nyadi pun ngempung rayat.
“Enti ngelama tu Tuan Yang Terutama Tun enggau Toh Puan datai ngundang rayat, tang malam tu rayat bela datai begempuru enggau Tuan Yang Terutama Tun enggau Toh Puan. Komuniti Kristian, Buddha, Tao, Hindu, Sikh, Bahá'í enggau komuniti pengarap bukai datai mai sampi, basa enggau bebaik.
“Chara kitai besampi engka bebida. Tradisyen enggau jaku kitai mega bebida. Tang malam tu, semua sampi nya bela ba siti pengandal ke sama - besampika Tuan Yang Terutama Tun enggau Toh Puan seruran diberi pengerai, pengelantang, pengaga enggau pemaik,” ku iya.
Iya nyebut jaku nya nengah teks dibacha Sapit Premier Sarawak, Datuk Amar Douglas Uggah Embas, maya Pengerami Makai Selamat Pengarap Bukai serimbai enggau Nyambut Hari Pengada Ke-80 Yang di-Pertua Negeri Sarawak, ke richah enggau penatai Tun Pehin Sri Dr. Wan Junaidi Tuanku Jaafar disempulang Toh Puan Datuk Patinggi Fauziah Mohd Sanusi di Amity Hall, Kompleks UNIFOR, ditu, malam Hari Lima.
Iya madah, pengelantang entara pupu raban bansa ke bebida pengarap patut ditegap belama nengah kaul ke manah, komunikasyen begulai sereta randau ke tau ngasuh rayat bela pechaya enggau meretika pangan diri.
Berindik ari nya, Unit Pekara Pengarap Bukai (UNIFOR) ngesan pangku pengawa besai nyadi jematan entara Perintah Sarawak enggau komuniti pengarap bukai dikena nempa pengandal enggau nentuka kaul nya majak dijaga.
Ku iya, pengelantang enda patut bepanggai ba siku tauka sekeda pengawa aja, tang patut disukung institusyen enggau disulur ngagai rebak dudi.
Ngena peluang nya, iya meri terima kasih ngagai Yang di-Pertua Negeri Sarawak ke udah mayuh jasa sekumbang idup, nyengkaum jasa besai ba pengawa negapka pun konstitusyen bekaul Sempekat Malaysia 1963 (MA63).
Pengerami nya bela nyadi pelasar komuniti Kristian, Buddha, Tao, Hindu, Sikh, Bahá’í enggau komuniti pengarap bukai begempuru ngenataika sampi, basa enggau pengelantang ati serimbai nyambut hari pengada ke-80 Yang di-Pertua Negeri Sarawak.
Sama datai, Sapit Premier Sarawak, Datuk Amar Professor Dr Sim Kui Hian, Menteri Utiliti enggau Telekomunikasyen Sarawak ke mega Menteri Ngempu Tanggungpengawa, Dato Sri Julaihi Narawi, Sapit Menteri Pengangkut (Tasik enggau Sungai) ke mega Sapit Menteri Ngempu Tanggungpengawa Pengerami Makai Selamat Pengarap Bukai (UNIFOR), Datuk Henry Harry Jinep enggau Direktor UNIFOR, Dato' Georgina Apphia Ngau. -EDISI UKAS
