KUCHING: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, nerima manah pemeri tambah Perintah Besai ngagai Sarawak ngagai RM16.2 bilion ungkup 2027, nambah RM1.1 bilion dibanding RM15.1 bilion taun 2026.
Iya madah, berita manah nya ngayanka kaul kereja entara Perintah Sarawak enggau Perintah Besai ke majak ditegap nengah randau begulai.
“Kemari Menteri Besai, Dato Seri Anwar Ibrahim udah nikika pemeri Perintah Besai ngagai Sarawak ke penyampau RM16.2 bilion. Terima kasih ngagai Perintah Besai,” ku iya.
Iya madah munyi nya ba mua mayuh maya Istiadat Baris Basa enggau Rapat Raksasa serimbai Hari Pengada Ke-80 Yang di-Pertua Negeri Sarawak, di Padang Merdeka ditu, Hari Enam.
Ngenang bekaul Pemeri Khas Interim, iya bela meri terima kasih ngagai Dato Seri Anwar berindik ari pekara dibantai maya Pengerami Hari Malaysia Renggat Kebangsaan 2026 kena 16 September nyin tadi.
“Maya nya, Menteri Besai udah ngemendarka Pemeri Khas Interim ngagai Sarawak ditambah ari RM600 juta ngagai RM1.5 bilion ungkup taun tu,” ku iya.
Nambahka nya ku iya, kerejasama nya deka ditampung bepelasarka pemereti ati enggau penaluk ke pangan diri, senutuk enggau langkar Konstitusyen Perintah Besai sereta Sempekat Malaysia 1963 (MA63). -EDISI UKAS
