KUCHING: Sepenyampau 1,350 iku dirintai nyadi penerima Tanda Basa, Bintang enggau Pingat Nengeri Sarawak Taun 2026 serimbai Hari Pengada Ke-80 Tuan Yang Terutama (TYT) Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar.

Ari penyampau nya, empat iku nerima Darjah Utama Yang Amat Mulia Bintang Sarawak, Panglima Negara Bintang Sarawak (P.N.B.S.) ke mai gelar Dato Sri.

Sida nya Yang Dipertua Dewan Negara, Dato’ Awang Bemee Awang Ali Basah, Akim Besai Sabah enggau Sarawak, Datuk Azizah Nawawi, Pro-Canselor Universiti Teknologi MARA (UiTM), Datuk Abdul Wahab Aziz enggau Datuk Tay Ah Ching @ Tay Chin Kin.

Seraya empat iku nerima Darjah Utama Yang Amat Mulia Bintang Kenyalang Sarawak, Panglima Gemilang Bintang Kenyalang (P.G.B.K.) ke mai gelar Datuk.

Penerima basa nya Dean Wayne Daly, Datuk Sebastian Ting Chiew Yew, Dato Idris Buang dan Dato’ Sri Syed Hamzah Syed Paie.

Ba Darjah Jasa Bakti Sarawak (D.J.B.S.) ke mai gelar Datu, enam iku nyadi penerima.

Sida nya Morshidi Frederick, Dzulkornain Masron, Dominic Chungat, Ir. Dr. Angelia Liew San Chuin, Ts. Dr. Peter Morin Michael Paong enggau Ustaz Mual Suaud.

Kelimpah ari nya, 24 iku nerima Darjah Utama Yang Amat Mulia Bintang Sarawak, Panglima Setia Bintang Sarawak (P.S.B.S.) ke mai gelar Dato.

Entara penerima nya Senator Rita Sarimah Patrick Insol, Senator Susan Chemerai Anding, Friday Belik, Sim Yaw Hang, John Ko Wai Seng, Profesor Firdaus Abdullah, Profesor Dr. Ahmad Hata Rasit, Ir. Profesor Lau Hieng Ho, Omar Mahli, Dr. Veronica Lugah, Abang Rahmat Yusuf enggau Shariman Jamli.

Bela nerima iya nya Temenggong Chek Bujang, Temenggong Abdullah Jamil, Temenggong Henry Bujang Sendan, Datuk Mohamad Zainal Abdullah, Abang Ehsan Abang Abu Bakar, Mej Jen Mohd Sobirin Mohd Yusof, Lau Kim Swee, Datin Azerina Mohd. Arip, Kong Chiong Ung, Abg Bohari @ Abg Buahari Abg Zen sereta penerima chara anumerta, niang Sibat Buyong.

Ba kategori Johan Bintang Sarawak (J.B.S.), dua iku nyadi penerima, nyengkaum siku penerima chara anumerta, seraya dua iku nerima Johan Bintang Kenyalang (J.B.K.).

Siku nerima Johan Perkhidmatan Cemerlang (J.P.C.), seraya 17 iku diberi Pingat Servis Nyulut (P.P.C.).

Berebak enggau nya, empat iku nerima Pingat Perwira Negeri (P.P.N.) Emas, nyengkaum tiga penerima chara anumerta, seraya lima iku nerima P.P.N. Engkeraju, nyengkaum siku penerima chara anumerta.

Rintai penerima bela mungkur kategori Pegawai Bintang Sarawak (P.B.S.), Pegawai Bintang Kenyalang (P.B.K.), Pingat Perkhidmatan Bakti (P.P.B.), Ahli Bintang Sarawak (A.B.S.), Ahli Bintang Kenyalang (A.B.K.), Pingat Perkhidmatan Terpuji (P.P.T.) enggau Bentara Bintang Sarawak (B.B.S.).

Pengawa meri tanda basa, bintang enggau pingat nengeri nya dikena ngaku jasa, pemanah pengawa enggau servis bala penerima ba mayuh bidang ungkup pemansang enggau pengelantang Sarawak.-EDISI UKAS