Telaga Adong Kechil West Ngasilka RM96 Juta Setaun
KUCHING: Pengawa ngeluarka minyak sepenyampau 800 tong sehari ari telaga Adong Kechil West di Marudi ulih mansutka asil rega RM96 juta setaun, bepelasarka rega minyak maya diatu, lalu nya ngayanka pengulih industri luyang minyak darat di Sarawak.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa ngeluarka ari siti telaga nya dipelaba berega RM8 juta sebulan, nunjukka pengulih pemansut minyak darat ke meri asil ngagai ekonomi nengeri.
“Pengawa ngeluarka minyak di Adong Kechil West di Marudi iya nya 800 tong sehari setimbang enggau RM8 juta sebulan bepelasarka rega maya diatu, iya nya sebaka enggau RM96 juta setaun, iya nya ari siti telaga aja,” ku iya.
Iya madah munyi nya ba mua mayuh maya Istiadat Baris Basa enggau Rapat Raksasa serimbai Hari Pengada Ke-80 Yang di-Pertua Negeri Sarawak, di Padang Merdeka ditu, Hari Enam.
Ngenang pekara bukai, iya bela madahka Petroleum Sarawak Berhad (PETROS) bela merambu ngemansangka siti da telaga ba tengan taun baru dikena meri bekal gas ngagai stesyen janakuasa turbin gas kitaran gabungan (CCGT) di Miri.
“Kelimpah ari nya, PETROS mega deka ngali siti da telaga explorasi di Kuala Baram ke ngembuan pengulih meransang pengawa ngeluarka gas,” terang iya.
Ngenang pekara bekaul, PETROS benung ngaga sambung batang paip gas sepanjai 65 kilometer ari Kidurong ke Zon Perindustrian Samalaju semak Bintulu.
Projek nya ditaga tembu ujung taun tu, lalu nya ngasuh genturung pengawa industri Samalaju nerima bekal gas dikena nangkup peminta industri nya. -EDISI UKAS
