KUCHING: Jasa Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar lebuh ngetanka pengelikun Sarawak lebuh gawa dalam Raban Polis Kampung di Sitak Pengelikun Rajang (RASCOM) majak dikenang nyadi sebagi ari sejarah pengawa iya ngagai nengeri tu.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Tun Pehin Sri Dr Wan Junaidi sanggup berambunka nyawa maya ngelaban penyelawai komunis nya pengawa besai dikena nentuka Sarawak nadai dikachau.

“Jasa Tuan Yang Terutama Tun ba pengawa ngetanka pengelikun Sarawak lebuh gawa dalam Raban Polis Kampung di Sitak Pengelikun Rajang tauka RASCOM, nyadi sebagi ari sejarah gawa ti semampai dikenang.

“Aku nemu jasa enggau sanggup berambunka nyawa maya ngelaban komunis deka majak nyadi sebagi ari sejarah pengawa Tun ungkup Sarawak ari dikachau komunis,” ku iya.

Iya madah munyi nya ba mua mayuh maya Istiadat Baris Basa enggau Rapat Raksasa serimbai Hari Pengada Ke-80 Yang di-Pertua Negeri Sarawak, di Padang Merdeka ditu, Hari Enam.

Ku iya, pejalai pengawa Tun Pehin Sri Dr Wan Junaidi ari raban nyaga pengelikun ngagai luyar, raban politik, kaban kabinet Perintah Besai enggau Yang di-Pertua Dewan Negara sebedau dipadu nyadi Yang di-Pertua Negeri Sarawak ngayanka pemayuh peneleba iya gawa perintah.

“Peneleba Tun Pehin Sri Dr Wan Junadi dalam bidang pengelikun, undang-undang, konstitusyen enggau administrasyen menua tentu udah meri siti perspektif ke besai ungkup belematika pejalai ngatur nengeri enggau menua,” ku iya. -EDISI UKAS

Pemberita: Jonnie Kiew
Gambar: Ibanez Jeffery Guang & Jaed Tepus