HARI EMPAT, 2 FEBRUARI 2023
KUCHING: Diskaun bil karan ungkup penguna domestik, komersial enggau industri kelimpah orang bedagang ba baruh Bantu Khas Sarawakku Sayang (BKSS) 9.0 deka ditandu nyentuk bulan Jun 2023.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, diskaun 5 ngagai 25 peratus beungkus RM200 juta ungkup bil karan nya deka ditandu nyentuk Jun tu ila lalu dibayar perintah Sarawak.
Ku iya, pekara tu deka meri pemaik ngagai pemegai akaun bantu nya di selampur Sarawak dikena nyaup rayat enggau orang bedagang betapi enggau penanggul ekonomi udah pandemik COVID-19.
“Ekonomi baru dibuka lalu deka nyaup orang bedagang mit enggau jelan pemesai kitai, nya alai meri diskaun karan sepemanjai enam bulan ba taun tu,” ku iya madah.
Iya bejaku munyi nya ba aum media di Kunsil Nengeri (DUN) Sarawak, kena Hari Empat.
Bela datai ba aum media tu iya nya Sapit Premier Sarawak, Datuk Amar Douglas Uggah Embas, Datuk Amar Awang Tengah Ali Hasan Enggau Dato’ Sri Profesor Dr. Sim Kui Hian, Sekretari Perintah Sarawak, Datuk Amar Mohamad Abu Bakar Marzuki, Menteri Utiliti Enggau Telekomunikasyen Datuk Julaihi Narawi, Menteri Industri Pemakai, Komoditi Enggau Pemansang Kandang Menua Sarawak, Dato Sri Dr Stephen Rundi Utom, Menteri Pemansang Raban Indu, Nembiak Mit Enggau Pengelantang Mensia Mayuh Sarawak, Dato’ Sri Fatimah Abdullah, Menteri Pelajar, Inovasyen Enggau Pemansang Pengelandik Sarawak, Datuk Roland Sagah Wee Inn, Sapit Menteri Ba Opis Premier Sarawak (Pekara Korporat, Pemadah Enggau UKAS) Datuk Abdullah Saidol enggau Sapit Menteri Pengatur Mengeri, Tanah Enggau Rampa Menua, Datuk Len Talif Salleh -EDISI UKAS
