KUCHING: Tetiap organisasyen di Sarawak nadai ngira agensi perintah, peribit tauka akademia dipinta ngemeran budaya integriti nyadi ‘DNA’ ba sida empu.
Sapit Menteri ba Opis Premier Sarawak (Integriti enggau Ombudsman) Datuk Dr Juanda Jaya madah, tetiap pangku pengawa ba siti-siti organisasyen ari polisi pengereja pengawa, atur pengawa kaunsil direktor nyentuk budaya kereja besehari-sehari patut ngena integriti nyadi pugu nempa ekosistem benchi makai suap ti meruan.
“Kitai ulih suah angkat sumpah, nyain mayuh dokumen sempekat enggau ngemendar polisi, tang enda puh, enda ngemeran pengawa enggau budaya ba diri empu, dia semua nya semina kelulu aja,” ku iya.
Iya nibar ke jaku nya ba mua mayuh rambau program Konferen Strategi Benchi Makai Suap Nasional (NACS) Edisyen Sarawak, ti diatur di Palan Konvensyen Borneo Kuching (BCCK), ditu, Hari Empat.
Ngenang konteks ngentap integriti di Sarawak, iya madah ke perintah seruran ransing ba atur pengawa ti manah enggau akauntabiliti.
“Unit Integriti enggau Ombudsman Sarawak (UNIONS) enggau Ombudsman Sarawak ditumbuh, sereta program Pegawai Integriti dipejalai ba tetiap agensi mandangka Sarawak meri perati ba isu integriti ti ukai semina rambai jaku aja, tang nyadi budaya atur gawa.
“Prinsip tu mega bisi ba Strategi Pemansang Pengudah COVID-19 (PCDS) 2030 ti nyelinting rayat patut ngasai pemansang sebela lebuh polisi enggau pemutus digaga enggau lurus, nadai dibalut ngiga untung kediri empu tauka penemu luar,” ku iya nyemetak.
Ngenang pasal program nya, iya madah ke tuju NACS Edisyen Sarawak ngayanka polisi gawa ti marit mensia mayuh andal enggau negap integriti institusyen.
Ku iya, NACS ukai semina dokumen polisi aja, tang nampung Pelin Benchi Makai Suap Nasional (NACP) ti terubah digaga dalam taun 2019 ngembing pengereja perintah, sektor peribit enggau komuniti MADANI negap akauntabiliti enggau bisi tanggungpengawa nasional. -EDISI UKAS
