MIRI: Pengawa nyain Brosur Tusun Ke-38 bagi Kluster 1, Kluster 2 enggau Kluster 3 serimbai Konferen Ke-38 Komiti Kereja Sosial Ekonomi (SOSEK) MALINDO Renggat Nengeri Sarawak enggau Provinsi Kalimantan Barat mujur diatur di Imperial Hotel, Miri, Hari Tiga.

Pengawa nya lambang Sarawak enggau Kalimantan sama keran negap kaul dua menua nyerangkung mayuh pengawa nyengkaum sosial, ekonomi, pengelikun enggau ngatur adan menua.

Batang pengawa sehari nya meda Sapit Sekretari Perintah Sarawak (Perambu Ekonomi enggau Pemansang), Dato Sri Dr. Muhammad Abdullah Zaidel begulai enggau Tuai Delegit SOSEK MALINDO Provinsi Kalimantan Barat, Ibu Linda Purnama, nyain Brosur Tusun SOSEK MALINDO Ke-38 kelai selubang penemu ke randau dua hari konferen nya.

Ku Dato Sri Dr. Muhammad Abdullah, sempekat pemereti ati nya mandangka kededua raban sama keran negap kaul begulai, kelebih agi nyerungkai pengulih baru kerajasama sosial, ekonomi enggau pengelikun adan menua.

“Kerejasama nengah pelasar SOSEK MALINDO ukai semina ulih nyungkak pemansang sosioekonomi aja, tang mantu ngurang asil menua tebasau ketegal aktiviti penyalah ngilah adan menua,” terang iya.

Ba Kluster 1 ti ngaul kerejasama ba pengawa sosial enggau budaya, keretas jurai disain Julin Alen enggau Dr. Randes Alexander Rombo-Nang.

Seraya Kluster 2 ti nyelinting pengawa ekonomi, dagang enggau kaul udah dipenyadi Robita Lee Robinson enggau Bapak Y. Anthonius Rawing.

Lalu Kluster 3, ti berandauka pekara pengelikun, pengelantang enggau atur adan menua diatur Abdul Halim Abang Naili enggau Dr. Randa Mahmudah.

Konferen sekali tu meri perati ngagai bemacham isu adan menua enggau sosioekonomi nyengkaum ngatur pejalai mai bangkai entara dua menua, operasyen Pos Lintas Batas Temajuk enggau Pos Matau Adan Menua Telok Melano, sereta isu ngaga rumah api ari raban Indonesia semak adan menua.

Kerejasama strategik tu mega meri perati ngagai pemesai guna negap pekara pengelikun adan menua ngambi aktiviti ekonomi muntang agi enggau asil menua enda dibasau ketegal aktiviti ngilah adan menua ti dikereja belalai.

Perambu mega dibantai ngambi Provinsi Kalimantan Utara enggau Kalimantan Timur dikaul ba randau deka datai nentuka rentayan kerejasama dikerembai di baruh pelasar SOSEK MALINDO.

Sama datai, Residen Bagi Menua Miri Galong Luang, Kepala Polis Sarawak Datuk Mohamad Zainal Abdullah, Direktor Kaunsil Pengelikun Nengeri Sarawak Hafizi Putit, Direktor Opis Imigresyen Malaysia Sarawak Abdul Halim Abang Naili sereta bala tuai opis nengeri enggau perintah besai.-EDISI UKAS