BARAM: Kampung Long Siut, Sungai Selungo, Baram diaku perintah nengeri ukai semina ngaku ari sukut administrasyen aja, tang nyadi lambang semangat begempung enggau penyerakup komuniti dia.

Ku Sapit Menteri ba Opis Premier Sarawak (Pengereja Kasar, Imigresyen enggau Matau Projek) ti nyadi Kaban Kunsil Nengeri (ADUN) Mulu, Datuk Gerawat Gala, aku nya mai reti chukup besai ngagai peranak dia, kelebih agi komuniti Kenyah Jamok, laban nya ngerandang peluang ngasai bemacham perengkaguna enggau pemansang ari perintah nengeri enggau agensi bekaul.

“Aku tu ukai semina besai reti ari sukut administrasyen aja, tang mega ngenang pengepuh, segulai sejalai enggau penyerakup komuniti dia.

“Ari status tu, Kampung Long Siut ulih nerima bemacham perengkaguna enggau bantu pemansang ari perintah nengeri enggau agensi bekaul,” ku iya ba mua mayuh rambau Pengerami Ngaku Kampung Long Siut enggau Nyiri Tuai Raban Bansa Long Siut kena Hari Dua.

Ba pengerami nya, Datuk Gerawat udah bejadi pengawa nyiri Lawai Ulok nyadi Tuai Raban Bansa keterubah Kampung Long Siut, siti pengawa sejarah ngagai komuniti dia ti diatu diaku ba tusun administrasyen nengeri.

Iya nyemetak madah pengawa nyiri Tuai Raban Bansa nya pangku pengawa besai ti patut disan enggau tanggungpengawa nyadi jematan entara perintah enggau peranak ba renggat baruh.

Pengerami diatur Komiti Pemansang ennggau Pengelikun Genturung Pendiau (JKKK) Long Siut, Sungai Selungo Baram nya mega digulu Pegawai Pelilih Telang Usan, Ezra Uda, bala tuai komuniti sereta peranak dial alu diatur chukup richah.-EDISI UKAS