SRI AMAN: Sepenyampau 24 ruang bilik di Rumah Tarang Jang, Entulang Entawa, deka ngasai pemaik asil projek dipejalai nengah Program Transformasyen Menua Pesisir (RTP) ungkup Sitak Kunsil Nengeri (DUN) Bukit Begunan taun 2025.

Projek beungkus RM200,000 ti dipejalai Opis Kereja Raya (JKR) nya ngaul kereja nyeruri rumah panjai nyengkaum nukar tile geladak, bingkai mua empelua, dik rumah enggau dik ruai.

Projek tu belabuh digaga Oktober nyin tadi lalu disadang tembu Disember 2025.

Pengawa bejadi enggau nyerah projek udah dipenyadi Kaban Kunsil Nengeri (ADUN) Bukit Begunan, Datuk Mong Dagang di Rumah Panjai Entulang Entawa kena Hari Empat.

Lebuh bejaku, Datuk Mong minta peranak begempung enggau nyukung pemansang ti dibai Perintah Sarawak dikemudi Gabungan Parti Sarawak (GPS).

"Perintah dikemudi GPS ngembuan polisi pemansang ti manah enggau nyau deka serap DUN Bukit Begunan diatu udah bisi rentayan jalai alun (kelimpah Langgir) enggau bekal kuasa karan 24 jam," ku iya.

Ba pengawa sama, iya bisi nyua geran Projek Pemansang Mit Menua Pesisir (MRP) penyampau RM55,000 ngagai enam Komiti Pemansang enggau Pengelikun Genturung Pendiau (JKKK), dua serakup enggau siti gerempung indu.

Entara penerima geran nya JKKK Rumah Rose Isa, Entulang Lalang, JKKK Jembai Munap, Melugu Skim, JKKK Edward Seli, JKKK Suat, Sungai Renggit, Gerempung Indu Wilson Bana, Po’Ai, Sokanjaya Bagi Menua Sri Aman, sereta Serakup Pengintu Pengelantang Islam Opis Kereja Raya (JKR).

Kelimpah ari nya, iya mega ngemendarka agih belanja MRP 2026 sepenyampau RM100,000 ngagai raban pengatur Dewan Sri Entulang, RM50,000 ungkupTabika KEMAS Rumah Panjai Entulang Entawa, RM10,000 ungkup JKKK Rumah Tarang Jang, sereta RM5,000 ungkup Gerempung Indu rumah panjai nya.-EDISI UKAS