BINTANGOR: Peranak Meradong ti udah lama nganti ngembuan kompleks lumba moden diatu berasai lantang lebuh pengawa nyeruri Kompleks Lumba Bintangor nyau deka tembu semua.
 
Kaban Kunsil Nengeri (ADUN) Meradong, Datuk Ding Kuong Hiing, madah ke projek nya udah dikemendar di baruh Langgur Pemansang Malaysia Lumpar Ke-12 (RMK12) ngena agih belanja RM2.5 juta.
 
Ku iya, projek nya dikemendar pengudah peminta nyeruri kompleks lumba nya suah ditagih ba Aum Kunsil Nengeri (DUN) ke udah.
 
“Kelimpah nyendiaka perengkaguna ti lantang agi, projek tu mega nyadi kelang nempa rebak biak ti regas ba main enggau lumba,” ku iya.
 
Iya ngena peluang nya meri terima kasih ngagai Opis Menteri Nembiak, Lumba enggau Pemansang Orang Dagang Sarawak (MYSED) ti udah ngemendarka agih belanja bejalaika projek nya.
 
Iya ngarap ke projek nya deka meri empas positif ngagai komuniti dia lalu nyadi palan aktiviti main enggau lumba ti bisi kualiti ngagai semua raban.
 
“Projek nyeruri Kompleks Lumba Bintangor disadang tembu lapan bulan, iya nya bulan November taun tu,” ku iya.
 
Berebak enggau nya, kereja nyeruri kompleks nya mungkur pengawa ngaga litar Belanda, padang bol, sistem parit, trek perejuk jauh enggau engkechit tinggi dikena nambah perengkaguna ti bisi. -EDISI UKAS