KAPIT: Perintah Sarawak ngemendarka agih belanja RM1.96 bilion dikena bejalaika projek nyeruri perengkaguna bekal ai di Bagi Menua Kapit, lalu nentuka bungkur enggau akses bekal ai beresi di sitak nya ditambah.
 
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Perintah Besai mega ngagihka belanja RM300 juta da ungkup pengawa nya.
 
“Tu dikena kitai nambah akses bekal ai ngagai selampur Kapit,” ku iya.
 
Iya madah munyi nya ba aum media pengudah ngetuaika Aum Komiti Penyeraris Pemansang Nengeri (SDCCM) ditu, Hari Empat.
 
Ba aum nya, penerang pasal pejalai projek agih belanja nengeri di Bagi Menua Kapit ari Opis Menteri Infrastruktur enggau Pemansang Penyangkai Kapal, Opis Menteri Utiliti enggau Telekomunikasyen, Opis Menteri Pengeraja Asal enggau Pemansang Mengeri, Opis Menteri Industri Pemakai, Komoditi enggau Pemansang Kandang Menua sereta Upper Rajang Development Agency (URDA).
 
Premier Sarawak madah baru, perintah nengeri mega ngaga sekeda projek jalai alun di bagi menua nya nyengkaum ngena agih belanja RM122 juta ungkup projek jalai di Merirai.
 
“Kitai mega ngaga sekeda jalai ditu ti deka nyambung Baleh, tekat ai enggau mega rumah panjai sereta genturung pendiau di menua ulu,” ku iya.
 
Berebak enggau nya, Premier Sarawak madah, URDA enggau RECODA bela nerima belanja tambah kedua penyampau RM1.5 bilion di baruh Langgur Pemansang Malaysia Lumpar Ke-13 (RMK-13).
 
“Tu dikena ngaga enggau nampung sekeda projek nyengkaum ti ngaul pengawa nambah  penatai pemisi ruang bilik,” ku iya.
 
Sama datai, Menteri Kereja Raya, Dato Sri Alexander Nanta Linggi, Menteri Utiliti enggau Telekomunikasyen Sarawak, Dato Sri Julaihi Narawi, Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn, Menteri ba Opis Premier Sarawak, Dato Sri John Sikie Tayai, Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah, Sekretari Perintah Sarawak, Datuk Amar Mohamad Abu Bakar Marzuki, sereta bala Sapit Menteri, bala Kaban Kunsil Nengeri Sarawak enggau bala tuai opis ke bukai.-EDISI UKAS