Projek Jalai Sitak Tunoh Nyungkak Pemansang Genturung Pendiau
KAPIT: Sitak Tunoh ditu deka dikemansang nengah rentayan jalai baru ti disadang nyadi penyungkak pemansang genturung pendiau dia.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, madah ke projek nya udah lama dilanggur lalu diatu deka digaga.
“Kitai udah ngemendarka projek ngaga jalai di Tunoh 7 kilometer pemanjai.
“Tu deka nyadi peluang kitai ngemansangka genturung rumah panjai.
“Kebendar tu udah lama dilanggur lalu diatu dipenyadi lalu kitai ngemansang sitak Tunoh," ku iya.
Iya bejaku munyi nya ba Program Merarau Begulai Enggau Komuniti di Balai Suarah Kapit ditu, Hari Empat.
Dulu ari nya iya bejadi begunan Upper Rajang Development Agency (URDA) enggau kelai bejadi nasih tanah hotel baru Kapit.
“Udah ngemansang infrastruktur, pengawa nangkan nya sosioekonomi.
“Baka ni jalai tu tau mai empas ngagai pengidup rayat laban Sarawak udah diaku bepenatai pemisi tinggi enggau juluk kitai nambah penatai pemisi ruang bilik,” ku iya madah baru.
Ngenang pekara bukai, Premier Sarawak madah, dunya terus ngaku Sarawak nyengkaum meri anugerah The Order of the Rising Sun, Gold and Silver Star ngagai iya.
“Hari Satu tu aku deka ke Jepun nerima anugerah nya.
“Reti nya, dunya ngaku kitai ari sukut pemansang, chara kitai mansang kelebih agi ari sukut ekonomi baru ti bepuguka kuasa enggau polisi ekonomi," terang iya.
Sama datai, Menteri Kereja Raya, Dato Sri Alexander Nanta Linggi, Menteri Utiliti enggau Telekomunikasyen Sarawak, Dato Sri Julaihi Narawi, Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn, Menteri ba Opis Premier Sarawak, Dato Sri John Sikie Tayai, Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah, Sekretari Perintah Sarawak, Datuk Amar Mohamad Abu Bakar Marzuki, sereta bala Sapit Menteri, bala Kaban Kunsil Nengeri Sarawak enggau bala tuai opis ke bukai.-EDISI UKAS
