Sibu Jaya Ngintu Genap Taun Ke-30, Mandang Pemujur Transformasyen Mengeri Satelit Moden
SIBU: Sibu Jaya ngintu genap taun ke-30 ti mandangka pemujur transformasyen ari genturung pendiau murah ngagai mengeri satelit moden.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pemujur Sibu Jaya asil ari tiga puluh taun perambu enggau kerejasama rat perintah nengeri, Kaunsil Pemansang Pengawa Berumah (HDC), Amcorp Group, opis bekuasa menua sereta komuniti dia.
“Ari rumah murah keterubah ti tembu ba taun 1996, Sibu Jaya diatu majak mansang nengah bemacham perengkaguna moden, rampa menua ti likun sereta aktiviti rama enggau jalai pengarap ti mandangka penyerakup rayat pupu bansa,” ku iya.
Iya madah munyi nya nengah teks jaku ke dibacha Sapit Menteri Pengerai Mensia Mayuh, Pengawa Berumah enggau Perintah Lokal Sarawak Datuk Michael Tiang Ming Tee serimbai Program ‘Kick Off’ Ngintu Genap Ke-30 Taun Sibu Jaya enggau Konsert Karnival Sibu Jaya 2025 di Palan Lumba Komuniti Azman Hashim kena malam Hari Enam tu tadi.
Bela datai, Menteri Dagang Temuai, Seni enggau Budaya Malaysia Dato Sri Tiong King Sing, Chairman Lembaga Penjaga Dana Kekayaan Berdaulat Sarawak Tan Sri Datuk Seri Panglima Sulong Matjeraie, Chairman Amcorp Group Berhad Tan Sri Azman Hashim sereta temuai dipebasa ke bukai.
Datuk Patinggi Abang Zohari madah transformasyen nya mega disukung pejalai Pelin Besai Sibu Jaya 2005, pengawa ngaga Jematan Durin ti nyambung Sibu Jaya enggau Jalai Besai Pan Borneo sereta pemansang bemacham perengkaguna pelajar enggau servis perintah.
Premier Sarawak mega madah, pemansang fizikal Sibu Jaya diumbaka komuniti ti inklusif sereta daya ulih nengah macham aktiviti rama enggau pengarap ti mandangka penyerakup rayat pupu bansa.
“Pengawa ngaga Masjid Al-Madinah Al-Husna taun dulu nyadi kelai pengelantang sereta nalan begelumu raban peranak menua,” ku iya.
