KUCHING: Perintah Sarawak nadai penanggul ngenegapka pengulih diri ngubah polisi sereta bejalaika pengawa ngatur rampa menua enggau efisyen sereta engkeman agi nyema diberi kuasa senentang pekara nya.
Sapit Menteri ba Opis Premier Sarawak (Undang-undang, MA63 enggau Kaul Nengeri-Perintah Besai) Datuk Sharifah Hasidah Sayeed Aman Ghazali madah, sekeda ari pemaik ba pekara tu iya nya ulih ngubah polisi, netap lalau enggau atur ke engkeman enggau gaya geografi, biodiversiti sereta konteks sosio-ekonomi Sarawak ti enda sebaka enggau nengeri bukai di Malaysia.
"Ari nya mega Sarawak ulih ngatur chara ke lebih agi fleksibel, engkeman sereta praktikal ba pengawa ngatur rampa menua nyengkaum pekara bekaul pemansang tanah, nyaga kampung enggau mutar penanggul ti ngeruga menua," pia ku iya.
Iya bejaku munyi nya maya nimbal tanya Kaban Kunsil Nengeri (ADUN) Tamin, Ir Christopher Gira Sambang ba Aum Kunsil Nengeri (DUN) Sarawak Ke-19, Hari Tiga.
Kelimpah ari nya iya madah, pengawa nyerahka kuasa nya bela deka ngenegapka agi pemujur pengawa matau enggau nerit adat dikena nentuka pengelikun rampa menua.
Ba pekara bukai bekaul pengawa Perintah Sarawak ngerumban ngambi hak ba Sempekat Malaysia 1963 (MA63) Datuk Sharifah Hasidah madah, tu nyengkaum ngatur randau, ngadu sereta matau pengawa nengah sistem matau berurun dikena nentuka tiap pemutus randau deka ditangkan pengawa ngatur.
