Pemutus Ngambi Jalai Batang, Peluang Baru Numbuh Pemansang Di Baram
KUCHING: Peranak menua pesisir Baram deka ngasaika pemansang jalai alun ke manah agi bepun ari pemutus Perintah Sarawak ngambi lebih 7,000 kilometer jalai batang di selampur nengeri.
Sapit Menteri ba Opis Premier Sarawak (Orang Gawa, Imigresen enggau Matau Projek) Datuk Gerawat Gala madah, ari penyampau nya, bisi 2,700 kilometer jalai batang ba Sitak Baram ke nyadi jalai suah ditengah peranak menua nya.
Ku iya, pemutus Perintah Sarawak nya deka nentuka jalai batang ulih diadu sereta dikemanahka agi enggau berenggat ti ngena belanja MARRIS ari Perintah Besai.
"Kami beterima kasih amat ngagai Premier Sarawak ke udah ngaga pemutus tu.
"Di Baram aja bisi 2,700 kilometer lalu enti jalai tu udah digazet nyadi jalai nengeri, kitai ulih nerima belanja ari MARRIS dikena ngadu enggau ngemanahka agi jalai tu enggau chara berenggat," pia ku iya.
Iya bejaku munyi nya maya betuaika 27 Tuai Raban Bansa enggau Genturung Pendiau (KMKK) ari beberapa pelilih mit di Baram begulai enggau Gerempung Kelabit Sarawak nemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kompleks Kunsil Nengeri (DUN) Sarawak ditu, Hari Tiga.
Datuk Gerawat mega madah, komuniti nya bela beterima kasih ngagai Premier Sarawak enggau Perintah GPS ke udah numbuh macham projek pemansang di Bario nyengkaum karan 24 jam, bungkur telekomunikasyen enggau internet sereta ai beresi.
Iya mega madah, sebagi ari peminta ti dikenatai ngagai Premier Sarawak iya ngaduka jalai batang ari Pasar Lapok ngelawa Bario ke ditengah lebih 100 buah rumah panjai.
Kelimpah ari nya, ku iya, komuniti Kelabit bela minta industri Beras Bario disungkakka moden agi ngambika ulih nambah asil beras ke diatu agi dikereja ngena chara lama.
Iya ke mega Kaban Kunsil Nengeri (ADUN) Mulu madah, maya penemuai basa nya, Premier Sarawak bisi bekunsika beberapa chara moden ke dikena ba industri bumai di Sarawak ditu ti udah mulaika mayuh asil.
Awak nya bela dikena komuniti Kelabit ngenataika peminta numbuh siti penuduk Temenggong ungkup raban Kelabit baka komuniti Orang Ulu ke bukai nyengkaum Lun Bawang, Bisaya enggau Penan.-EDISI UKAS
