Sapit Menteri Raban Nembiak, Lumba enggau Pemansang Orang Dagang Sarawak Datuk Gerald Rentap Jabu madah, Kaunsil Lumba Sarawak (SSC) udah dipadu nyadi agensi ngatur projek nyeruri nya.
"Sekeda ari skop projek tu iya nya ngadu palan duduk, masang sistem lampu LED baru enggau skrin LED, ngadu kaunter tikit, bilik begari, jamban enggau surau kelimpah ngemanahka agi infrastruktur ke udah bisi," pia ku iya.
Iya nerang ke pekara nya dikena nimbal tanya Kaban Kunsil Nengeri (ADUN) Tupong, Dato Fazzrudin Abdul Rahman maya Aum Kunsil Nengeri (DUN) Sarawak Ke-19, Hari Tiga.
Nerang silik iya madah, projek nya deka nentuka stadium nya engkeman alai ngatur macham tikas pekit nyengkaum Liga Premier Sarawak.
Bekaul pemansang lumba ba renggat menua, ku iya, Opis Menteri Raban Nembiak, Lumba enggau Pemansang Orang Dagang Sarawak (MYSED) nengah SSC semampai meransang ngenegapka agi kerejasama gerempung lumba nengeri, Opis Pelajar Sarawak sereta agensi enggau sida ti bekaul.
Ku iya, kerejasama tu dikena nentu pemansang lumba ulih berengkah ari sekula.
"Tu nyengkaum ngadaka 'jurulatih' ari bala raban pengajar, ngatur program nyidi penau bekaul macham bansa lumba, ngatur pekit di sekula enggau komuniti sereta ngatur pemansang atlit ti lebih agi sistematik," ku iya madah.
Iya mega madah, SSC bisi ngatur kus sains lumba Tikas 1 nyentuk Tikas 3 dikena ngadaka mayuh agi 'jurulatih' enggau pengulih ba macham bansa lumba. -EDISI UKAS
