KUCHING: Bintulu Port Hodling Berhad (BPHB) majak ngentapka penuduk nyadi penyangkai kapal besai Sarawak ungkup taun tu pengudah ngerikod ngatur kargo sepenyampau 38.3 juta tan naka September 2025 ti ngaul 5,649 kapal.
Presiden ti mega Tuai Pegawai Eksekutif Bintulu Port Holdings Berhad Group (BPHB) Dato’ Roslan Abdul Ghani madah, BPHB napi pemar baka nyeruri gas asli cecair (LNG) enggau gaya hari ti enda tentu tang terus ngentapka penau ngatur sereta meri servis ti efisyen.
"Timpuh ngalihka kapal kami mengkang kompetitif, disukung enggau tikas pemisi perengka ke diguna semak 90 peratus, ngayanka pengeransing kami bejalaika operasyen enggau efektif sereta efisyen," ku iya.
Iya madah munyi nya maya bejaku ba Program Bintulu Port Customer Centric Nite 2025 ke dipenyadi Sekretari Perintah Sarawak ti mega Chairman BPHB Datuk Amar Mohamad Abu Bakar Marzuki ditu, Hari Dua.
Nambah ke jaku iya, Dato Roslan madah, penyangkai kapal diatu ba proses bejalaika Sistem Operasyen Penyangkai Kapal ngena teknologi moden iya nya sistem pemadu baru di dunya ti bela dikena ba Penyangkai Kapal Yangshan Renggat Keempat, Shanghai, China.
Kelimpah ari nya, iya madah, Bintulu Port konsisten ngatur lebih 80 peratus ari penyampau import enggau eksport Sarawak ninting taun, lalu negapka tanggungpengawa iya nyadi pemekuh pemansang ekonomi nengeri sereta penyambung ngagai makit antarabansa.
"Seriris enggau idar pekara kuasa global nuju pemeruan, kami sedia ngesan tanggungpengawa besai ba sektor baru baka hidrogen gadung enggau logistik kuasa ulih dikena baru.
"Tu mih bidang pemansang baru lalu Bintulu Port besedia nyaup pekara nya," ku iya.
Ba batang program nya, BPHB bela meri basa ngagai penguna enggau bakih industri ti udah mandangka penyulut ba 11 kategori besai, ngayanka bemacham industri enggau servis ti nyungkak ekosistem penyangkai kapal nya.
