KUCHING: Kerejasama Sarawak nengah Opis Menteri Kuasa enggau Pemeruan Rampa Menua (MEESty) enggau DNV Norway deka nyaup ngerumban agi pemansang kuasa beresi nengeri tu.

Sapit Menteri ba Opis Menteri nya, Datuk Dr Hazland Abang Hipni madah, Sarawak benung ngatur singkang ngadu pemansang kuasa baru ti begunaka pengelandik raban nya.

Ku iya, tu beguna ketegal Sarawak ukai semina mekal kuasa ba nengeri ditu aja tang nyual ngagai menua bukai ke besemak kelimpah bela bisi langur deka dikerembai ngagai Asia Pasifik.

"Ba penuduk geografi di rantau Asia Pasifik, Sarawak ba tengah-tengah, enti dibanding enggau Australia ke jauh ti bekenaka mayuh agi ungkus.

"Nya alai, perintah nengeri benung ngelangkar pelin baru dikena nyungkak pemansang industri kuasa gadung ba rantau tu nyengkaum dagang baka ngagai China, Jepun, Korea enggau menua bukai," pia ku iya.

Iya nerangka pekara nya ba aum media sepengudah berandau enggau Tuai Serantau Sistem Kuasa Asia Pasifik bagi Hidrogen enggau CCUS DNV, Dr Thomas Koller ditu, Hari Tiga.

Kelimpah ari nya, Datuk Dr Hazland madah, landskap kuasa dunya diatu benung jampat berubah lebih agi ketegal geopolitik global nyengkaum penyarut ba Timur Tengah ti ngujungka mayuh menua ngurangka agi kelalu bepanggai ba minyak enggau gas.

Tang ba Sarawak ku iya, pekara nya tau nyadi pengelebih ketegal ke bisi pun pengeraja asal baka kuasa hidro enggau Solar.

"Sarawak ulih ngasilka kuasa gadung enggau ungkus ke mimit agi enti dibanding enggau menua bukai lalu tu deka nempa Sarawak nyadi 'bateri Asia'," ku iya madah baru. -EDISI UKAS