LIMBANG: Pemansang pelajar mengkang nyadi pekara dikemeratka Perintah Sarawak dikena ngadaka mayuh agi rebak baru bepenemu, bepengelandik sereta ulih besemekih seriris enggau peminta maya hari tu enggau ubah pemansang ekonomi nengeri.

Sapit Menteri Industri Pemakai, Komoditi enggau Pemansang Wilayah Sarawak, Datuk Dr Abdul Rahman Ismail madah, sukung nya dipandang nengah macham inisiatif nyengkaum nyungkak pemanah sistem pelajar sereta nerenak pengerindu nembiak ba pelajar Sains, Tekonologi, Injiniring enggau Matematik (STEM).

"Kitai ukai semina begunaka sistem pelajar betikas tinggi aja tang rayat patut nemu pemesai reti pelajar ke dikena nempa pemujur rebak dudi hari," ku iya maya Pengerami Aidilfitri PIBG SK Melayu Pusat 2026 ditu, Hari Dua.

Kelimpah ari nya, iya madah, penemu bekaul pemesai guna pelajar STEM meseti disungkakka agi nyerumba pelajar nya nyadi pemun ngagai pemansang industri teknologi tinggi.

Nya alai, iya madah, chara ngajar mega meseti narit ati, praktikal sereta relevan agi dikena matak mayuh nembiak ngambi pelajar nya.

Ba pengerami nya, iya bisi ngungkupka pemeri RM5,000 ngagai PIBG SK Melayu Pusat enggau RM30,000 dikena nyaup meli kereban belajar.

Kelimpah ari nya, iya mega madahka langgur ngaga jalai beperabung nengah belanja Projek Transformasyen Menua Pesisir (RTP) taun siti agi. -EDISI UKAS