DID Sarawak Negap Budaya Integriti, Nerima Setipikit ISO Renggat Antarabansa
KUCHING: Pengawa ngatur Hari Integriti ukai semina simbolik aja tang mandangka pengeransing ngenegap integriti, akauntabiliti enggau penyulut ba Servis Kereja Perintah Sarawak (SCS).
Sapit Premier Sarawak, Datuk Amar Profesor Dr. Sim Kui Hian madah, inisiatif nya nyadi manifestasi orang kereja perintah nentuka pengelurus gawa, ngemeran integriti sereta efisyen.
Iya bejaku munyi nya maya bejadika Hari Integriti Opis Parit enggau Entali Ai (DID) Sarawak 2026 ditu, Hari Tiga.
Pengawa berambaika jaku 'Tegap Integriti, Penyulut DID Sarawak' sebagi ari pengeransing nyukung juluk ati perintah nengeri nyapai status nengeri ngembuan integriti tinggi manggai taun 2030.
Iya madah, Discipline in Execution: Approach (DIEA) ke digaga nengah inisiatif PCDS 2030 beguna dikena nentuka tiap bengkah langgur ulih dikemujur sereta mai pemaik ngagai rayat.
Ku iya, pengarap rayat ngagai perintah semina ulih tan nyema chara gawa ngemeranka pengelurus sereta likun ari salah kena kuasa.
Ba pengawa nya, DID Sarawak bisi nerima dua iti setipikit antarabansa iya nya MS ISO 37001:2016 (Anti-Bribery Management System, ABMS) enggau MS ISO 9001:2015 (Quality Management System).
Setipikit nya disua Tuai Pegawai Eksekutif SIRIM QAS International Sdn Bhd ngagai Direktor DID Sarawak, Datu Ir. Ts. Ahmad Denney Ahmad Fauzi ti dikemata Datuk Amar Dr. Sim.
Bela datai maya nya Sapit Menteri Pengerai Mensia Mayuh, Pengawa Berumah enggau Perintah Menua Sarawak, Datuk Dr Penguang Manggil.-EDISI UKAS
