KUCHING: Opis Menteri Pemansang Indu, Nembiak Mit enggau Pengelantang Komuniti (KPWK) nyukung pengawa Polis Diraja Malaysia (PDRM) Sarawak munas salah guna dadah enggau substans di nengeri tu.

Menteri ba opis menteri nya, Dato Sri Fatimah Abdullah madah, pengawa nya seriris enggau siti ari 13 isu rama ti dikemerat KPWK, iya nya mutar salah guna dadah enggau substans.

“Kami gaga lebuh Kepala Polis Sarawak meri perati ba isu dadah enggau substans di Sarawak.

"Tu siti ari pekara ti dikemerat Opis Menteri,” ku iya.

Iya madah munyi nya maya dirandau media pengudah nerima penemuai basa ari Kepala Polis Sarawak, Datuk Mohamad Zainal Abdullah ditu, Hari Dua.

Iya mega meri pengaga ati ngagai Datuk Mohamad Zainal ti udah dichiri nyadi Kepala Polis Sarawak lalu madah ke pengawa netapka Key Performance Indicator (KPI) ngagai Tuai Polis Pelilih sebagi ari chara ti proaktif nentuka pemujur pengawa neritka adat ba menua.

“Aku nemu Datuk udah netapka KPI ngagai Tuai Polis nyentuk ngagai renggat pelilih dikena nentuka pengawa nangkap orang ke salah ngambi sereta nyadung dadah majak dipejalai,” ku iya nerang.

Nitih ku Dato Sri Fatimah, KPWK masa kaul rat enggau kerejasama strategik begulai enggau PDRM ti ukai semina beratika isu dadah aja, tang mega nyerangkung bemacham pekara rama bukai.

“Kami ngarap kaul manah ti disintal Opis Menteri enggau PDRM deka terus tegap ba baruh jaga iya dikena nentuka pengelantang komuniti Sarawak majak diintu,” ku iya.

Sama datai, Sapit Menteri Pemansang Indu enggau Nembiak Mit, Datuk Rosey Yunus, Sekretari Mendam KPWK, Datu Felicia Tan Ya Hua sereta temuai dipebasa ke bukai.-EDISI UKAS