WELLINGTON: Perintah Sarawak nengah Opis Menteri Industri Pemakai, Komoditi enggau Pemansang Kandang Menua (M-FICORD) negap kerejasama enggau New Zealand ba sektor industri pemakai lebih agi inovasyen betanam betupi, latih veterinar, pemansang industri tenusu enggau nambah sistem biosekuriti.

Menteri ba opis menteri nya, Dato Sri Dr Stephen Rundi Utom maya betemu enggau Menteri Biosekuriti enggau Jamin Bekal Pemakai New Zealand ke mega Sapit Menteri Betanam Betupi (Pengintu Pengelantang Jelu enggau Pengelandik) sereta Sapit Menteri Rampa Menua, Andrew Hoggard, madah, pengeran Sarawak negap kerejasama enggau New Zealand nengah pengawa besilih penemu, sistem ngadu purih moden sereta nambah manah pengawa ba kebun enggau sistem nyidi jelu tupi.

“Sarawak mega merambu nganjung pegawai veterinar ngulu latih profesional sereta teknikal di New Zealand dikena nambah pengelandik sereta penemu.

“Kelimpah ari nya, Sarawak mega bisi ati deka nyerungkai peluang meranak puku begulai ba sektor tenusu nengah bekunsi teknologi enggau pengulih kerejasama enggau New Zealand,” ku iya nengah siti penerang, Hari Dua.

Ba pengawa nagang eksport chapi idup ba menua nya, Sarawak benung nisih chara bukai dikena ngadu import semen chapi ari New Zealand dikena nambah kualiti purih sereta pemansang jelu tupi ba menua.

Berebak enggau nya, Dato Sri Dr Stephen Rundi mega berati ke sistem biosekuriti New Zealand ti tebilang ba renggat global, nyengkaum atur entara menua, rentayan matau penyakit sereta mekanisme timbal penanggul ngenyit.

Iya madah, peneleba nya besai amat reti ba negap pengawa besikap veterinar enggau jamin pemakai di Sarawak.

“Model penyulut New Zealand bepuguka chara ti komprehensif ke ngempung polisi, pansik enggau pejalai pengawa. Sarawak ngembuan juluk nipak pengawa pemadu manah tu dikena nempa sektor betupi ke tan enggau ulih besemekih ba renggat global,” ku iya nerang.

Pengudah penemuai basa nya, deligit Sarawak bela ngulu program penerang teknikal ba Opis Menteri Industri Utama (MPI) ari pegawai kanan nyengkaum Jim Sim, Dr Jed Johnson, Dr Lia Missena enggau Glen Webber.

Penerang nya mungkur bekaul servis verifikasyen, sistem jamin halal sereta program matau pengerai jelu lalu meri penerang silik bekaul sistem atur pengelikun pemakai, sijil halal, atur pengerai jelu di New Zealand.

Iya madah kerejasama tu nyadi siti agi inisiatif besai nuju nyintal kaul timpuh panjai ba pengawa mansik jelu tupi, nempa kapasiti veterinar, pengawa meranak puku tenusu enggau atur biosekuriti.

“Kami ransing nyeraris sektor pemakai enggau komoditi Sarawak nengah belajar pengawa pemadu manah dikena ba antarabansa. Kerejasama tu deka ngerumban pengeransing Sarawak nyadi negeri pengeluar pemakai ti beresi sereta ulih besemekih manggai taun 2030,” ku iya.

Sama datai, Sapit Menteri M-FICORD Datuk Martin Ben, Direktor Opis Servis Veterinar Sarawak Datu Dr Adrian Susin Ambud, Sekretari Kanan Bagi Liew Ju Jeng, Pegawai Veterinar Kanan Dr Sylie Al-Harir, Pesuruhjaya Tinggi Malaysia ke New Zealand Mazita Marzuki sereta temuai dipebasa ke bukai. -EDISI UKAS