TATAU: Perintah Sarawak terus berati ke bidang pelajar bepuguka Sains, Teknologi, Injiniring, Seni enggau Matematik (STEAM) dikena nempa rebak biak ti landik sereta ulih nangkup peminta pengereja pengawa ba sektor teknikal di nengeri tu.

Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, pengeransing negap pelajar STEAM beguna endar dikena nyikap nembiak ngena pengelandik jeman ke-21, seriris enggau pemansang automasyen, digitalisasyen enggau globalisasyen.

“STEAMify ukai semina siti karnival, tang pelasar dinamik ti meri peluang ngagai nembiak berunding, nengkebang sereta mutar penanggul ngena penemu ba bidang STEAM,” ku iya ba Program Nutup STEAMify Explorafest Carnival 2025 di SK Sungai Bagiau ditu, Hari Dua.

Iya madah, program baka tu ukai semina matih nembiak berunding ngena chara kritis enggau kreatif, tang mega nempa pengulih komunikasyen ti manah ukai semina dikena nipak diri ba dunya kereja tang mega dikena napi dudi hari.

Iya madah baru, beratika pelajar nya beguna dikena nempa pengereja pengawa landik ti diguna ba kandang industri baka Samalaju, Bintulu, setipak enggau pelin pemansang ekonomi nengeri bepuguka penemu enggau teknologi.

Sama datai, Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis sereta bala pegawai kanan opis menteri enggau Opis Pelajar Pelilih Tatau/Sebauh.-EDISI UKAS