MARUDI: Pengawa Ngelanchar Projek Jalai Miri–Marudi–Mulu–Long Lama (MMMLL) ngerandang lambar baru ti deka mai pemansang ngagai sitak Baram.

Sapit Menteri Pengerai Mensia Mayuh, Pengawa Berumah enggau Perintah Lokal ti mega Kaban Kunsil Nengeri (ADUN) Marudi, Datuk Dr Penguang Manggil madah, projek nya ukai semina ngaga jalai baru tang mega penyungkak besai ngagai penyambung, pengelikun enggau pemansang sosioekonomi komuniti lokal.

"Sehari tu nyadi pemungkal ngagai transformasyen meruan Baram ari sitak menua ulu ngagai kandang menua ti progresif enggau besemekih," ku iya ba Pengerami Ngelanchar Projek Jalai MMMLL ti dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg kena Hari Enam.

Ngenang baru lebuh belabuh megai pangku pengawa nyadi pengari rayat ba taun 2016, iya nerang ke gaya jalai ti jai entara Miri enggau Marudi sereta timpuh pejalai nyentuk tiga jam udah nating peranak.

Dikena mutar pekara nya, iya bejalaika inisiatif profesional enggau nyendia siti Pelin Besai Pemansang ti nyerangkung sitak Marudi, Bakong enggau Tinjar.

"Ari perambu asal nyentuk sehari tu, perintah keran nentuka peranak Baram ngasai perengkaguna pemadu manah," ku iya.

Ku Datuk Dr Penguang, Baram terus nerima perati perintah nengeri nengah pengawa ngemendar agih belanja bebilion ringgit ungkup inisiatif pemansang infrastruktur nyengkaum ngagai jalai enggau jematan, bekal ai menua pesisir, bekal kuasa karan menua pesisir, ngemanah telekomunikasyen enggau bemacham perengkaguna pemun bukai.

Iya nyemetak madah, pemansang nya nipak polisi “Rural Biased Development Policy” ti ngemerat pemansang sebela entara mengeri enggau menua pesisir. -EDISI UKAS