SIMANGGANG: Karnival TVET Sarawak 2025 diatur Tabung Ekonomi Gagasan Anak Sarawak (TEGAS) belabuh diatur enggau dipasuk lebih 50 agensi perintah sereta peribit seraya nyadi pelasar besai meransang pemansang penau teknikal pemadu besai ba nengeri tu.
Sapit Menteri Perambu Mengeri, Pengatur Tanah enggau Rampa Menua Sarawak ti mega Chairman Kaunsil Amanah TEGAS, Datuk Len Talif Salleh madah, pengawa ngatur karnival empas besai nya inisiatif strategik negap agenda TVET nengeri.
“TVET nya pilih kritikal dikena nempa pengereja landik lokal ti ulih tetangkupka peminta industri moden.
“Nembiak kitai meseti sedia neleba kediri enggau ubah teknologi sereta peminta makit kereja,” ku iya lebuh pengerami bejadi karnival nya ba Balai Suarah Sri Aman, kena Hari Enam.
Ku iya, kerejasama sektor baka minyak enggau gas, pekara wang, kilang sereta industri teknikal bukai nyeremin komitmen mayuh raban nyukung pemansang penau lokal.
Ku Datuk Len, karnival tu nerus pemujur program TEGAS sebedau tu baka SCaT Fair enggau PRoDR ti nyata nyadi penyungkak mayuh nembiak ba bidang TVET.
Iya mega minta nembiak Sarawak ngena manah peluang ti disedia sepanjai karnival dikena nempa pemansang kereja ti tegap agi.
Pengerami nya mega digulu ADUN Lingga Dayang Noorazah Awang Sohor, Sapit Residen Bagi Menua Sri Aman Charlie Keling, Pegawai Pelilih Sri Aman Shariff Bujang sereta Pemangku Tuai Pegawai Eksekutif TEGAS Fredick Kevin Buseli. - EDISI UKAS
