KUCHING: Pelakun tebilang Hong Kong, Simon Yam madah kediri temegah meda pengelain budaya ba Sarawak ditu.

Iya ti dirandau pengudah sesyen Meet & Greet serimbai Asian International Film Festival & Awards (AIFFA) 2025 kena Hari Enam mega madah ke pengingin mai peneleba kreatif iya ngagai Sarawak nengah projek filem ti mandang penyelai budaya lokal enggau gaya komuniti ditu ti chukup kemerah.

Ku iya, pemanah chura, pengerichah enggau peranak Sarawak ti chukup kemerah meri inspirasyen ngagai iya ngaga projek filem enggau komedi seraya mandang budaya nengeri nya ngagai dunya.

Iya mega madah, AIFFA nyadi pelasar pemadu manah ngagai pengemeran filem enggau peminat ba Asia Tenggara seraya andal ke festival tu ulih ngangau ke pengemeran filem ari Korea Selatan, Australia, Jepun, enggau Timur Tengah.

“AIFFA nya pelasar ti manah ungkup Asia Tenggara tang aku ngarap ba timpuh dua taun da, AIFFA ulih nentuka pengemeran filem ari Korea Selatan, Australia, Jepun, enggau Timur Tengah ulih begulai.

“Nya kebuah, kitai deka bisi pelasar ti manah ungkup peminat ari mayuh menua begempuru, berandau sereta ngasai peneleba begulai enggau AIFFA ti richah enggau ranchak agi,” ku iya ba aum pemberita.

Ba sesyen nya, iya mega bekunsi peneleba lebih 30 taun ba industri filem Hong Kong lalu ngemeratka semangat kerejasama kru filem kunchi pemujur sesebengkah produksyen.

Bela datai, Sapit Menteri Dagang Temuai, Industri Kreatif enggau Seni Pemerindang Sarawak Datuk Sebastian Ting Chiew Yew, Sekretari Mendam Menteri Dagang Temuai, Industri Kreatif enggau Seni Pemerindang Sarawak Datu Sherrina Hussaini, Direktor Festival AIFFA 2025 Livan Tajang, Direktor Eksekutif AIFFA 2025 Jaffri Amin enggau Shah Sidek.-EDISI UKAS

Pemberita: Betrice Britney Dee
Gambar: Betrice Britney Dee