KPWKM Negap Indu Sarawak Nengah Program Advokasyen Siru Ke Indu @ Kapit
KAPIT: Pengawa negap raban indu Sarawak terus ditegap lebuh Opis Menteri Pemansang Indu, Ruang Bilik enggau Komuniti (KPWKM) ngatur Program Advokasyen Siru Ke Indu @ Kapit: Dinamik & Bebatak Asur Mutar Ulah Kasar ba Balai Komuniti Melayu, Kampung Muhibah, ditu kena Hari Enam.
Menteri Pemansang Indu, Ruang Bilik enggau Komuniti, Dato' Sri Nancy Shukri madah, atur program nya nyadi pelasar beguna nentuka raban indu ba Sarawak ukai semina dijaga tang mega nerima latih pengelandik, sukung bedagang enggau bantu psikososial ngambi bulih pengidup ti menyana agi.
Ku iya, kenyau ari taun 2021, bisi 21,274 indu ba selampur menua udah nerima pemaik nengah Program Indu Dinamik nyengkaum manggai 8,000 indu ba Sarawak mujur diembing nengah mayuh latih sereta bantu puku belanja.
Dato Sri Nancy mega madah, mayuh penyereta diatu udah ngepun dagang pemakai, dagang online enggau nyendia peluang gawa ngagai komuniti lokal.
Nangkan nya, nyerumba pengerami ngintu Hari Mutar Ulah Kasar Ngagai Indu (EVAW) kena 25 November tu, Dato Sri Nancy mai semua rayat Malaysia ngena baju chura oren kelai solidariti sereta lambang pengadang dudi hari ngambi nadai agi ulah kasar nyadi ba raban indu.
Iya nyemetak madah, indu nya komponen beguna ba pemansang ruang bilik, komuniti enggau menua, nya kebuah pengelikun enggau pengelantang sida meseti semampai dikemerat.
Dato Sri Nancy mega ngelalau raban lelaki nyadi bakih ngetu ulah kasar ba indu seraya nyemetak madah ke komuniti ti bebasa ke indu nya komuniti ti amat bisi tamadun.
Sama datai iya nya Menteri Kereja Raya Malaysia ti mega Kaban Parlimen Kapit Dato Sri Alexander Nanta Linggi enggau Sapit Menteri ba Opis Premier Sarawak (Undang-undang enggau Adat Bumiputera) ti mega Kaban Kunsil Nengeri (ADUN) Bukit Goram Datuk Jefferson Jamit Unyat.-EDISI UKAS
