BINTANGOR: Pengawa baka Pekit Ngajat & Betaboh beguna endar dikena ngetan enggau nyagu main asal Iban ba Pelilih Meradong ngambi terus idup enggau meruan ditampung rebak dudi.
Kaban Kunsil Nengeri (ADUN) Meradong Datuk Ding Kuong Hiing ngelalau rebak biak ransing ngaul diri ba aktiviti main asal nyadi inisiatif nentuka pesaka aki ini kitai kelia enda lenyau diserang arus pemansang ti majak moden.
“Nengah pengeransing enggau pengangkun sida, reti budaya enggau semangat angkun ke pesaka bansa deka terus idup seraya mandang penyelai budaya kitai ngagai rebak biak enggau bala temuai ti datai ngagai pelilih tu,” ku iya.
Iya nyebut jaku nya ba Pekit Betaboh & Ngajat serimbai Pengerami Meradong 2025 di Panggau Besai kena Hari Lima.
Pekit Ngajat & Betaboh tu udah diatur tiga kali bejurut serimbai Pengerami Meradong.
Atur pekit taun tu dikemujur Gerempung Tuai Rumah Pelilih Meradong lalu dipasuk rayat Sarawak beumur 12 taun enggau tuai ari nya.
Bisi tujuh tim ngambi bagi ngerebut perais mata duit ti disedia.
Ba pengerami sebaka, Datuk Ding mega ngemendar Geran Khas Projek Mit Pemansang Menua Pesisir (MRP) penyampau RM5,000 deka diagih ngagai Gerempung Tuai Rumah Pelilih Meradong ba taun 2026 dikena nyukung atur program main asal taun baru. -EDISI UKAS
