BETONG: Gerempung Apai Indai enggau Pengajar (PIBG) sereta apai indai dipinta ngena chara belajar hibrid enggau ngena pelasar digital ba pelajar besehari-sehari.

Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu madah, nembiak meseti diembing ukai semina ba akademik tang mega pengelandik dudi hari baka STEM, teknologi enggau pengelandik.

“Rebak diatu meseti diajar bidang kuasa ulih dikena baru, semikonduktor, robotik, teknologi digital enggau Artificial Intelligence (AI) nyadi penyikap napi peminta kereja ti majak kompetitif," ku iya.

Iya nyebut jaku nya ba Pengerami Merarau PIBG SK St Bartholomew, Betong di Balai Panglima Rentap kena Hari Lima.

Sama datai, Kaban Parlimen Betong Dato Dr Richard Rapu, Kepala Pengajar SK St Bartholomew Jerry Kani, Yang Dipertua Kho Ah Chu enggau Chairman Kaunsil Pengatur Sekula Joseph Bobby.

Kaban Kunsil Nengeri (ADUN) Layar nya nyemetak madah, penyulut pelajar begunaka sukung ari semua komuniti iya nya pengajar, apai indai, komuniti lokal enggau agensi perintah.

Ba pengawa nya, Datuk Gerald enggau Dato Dr Richard ngemendar pemeri bela RM10,000 enggau RM5,000 ngagai PIBG SK St Bartholomew dikena nyukung pemansang sekula. -EDISI UKAS