MUKAH: Program Hari Begulai enggau Penguna sereta Karnival Nembiak Mit diatur Librari Mensia Mayuh mukah mujur matak komuniti lokal seraya negap tanggungpengawa librari nyadi palan penemu enggau malin ti semampai relevan.

Kaban Kunsil Nengeri (ADUN) Tellian, Royston Valentine madah, program baka nya beguna endar ngambi meri penerang ngagai mensia mayuh pasal pangku pengawa sereta servis ti disedia sesebengkah agensi perintah.

Ku iya, nengah program baka tu, komuniti ulih berati ke perengkaguna sereta pemaik ti disedia librari nya.

“Enti suba, perati diberi ngagai nembiak mit ti datai macha tang diatu nengah pemansang teknologi, budaya tu majak kurang.

“Taja pia, librari tetap diguna laban nya nyendia kereban bacha online, surat berita, bup enggau mayuh kereban malin chara konvensional,” ku iya.

Iya nyebut jaku nya lebuh bejadi Hari Begulai enggau Penguna sereta Karnival Nembiak Mit ba Librari Mensia Mayuh Mukah, kena Hari Enam.
Berebak enggau nya, iya madah ke kereban chelak agi relevan ba jeman digital.

Nya kebuah ku iya, pengawa macha ari bup nentuka sida berati ke ari siti lambar ngagai siti lambar nyentuk lambar kepenudi.

Ngenang Hari Karnival Nembiak Mit, bisi semilan penyereta ari raban OKU udah nunjukka penau sida ba bemacham pemerindang.

Royston mega muji pemerani sida ba mua bala mayuh ti nyadi siti pemujur ti patut dikemegah.

Iya nyemetak madah, kaul mensia mayuh beguna endar nentuka raban OKU enda dikelaung seraya sukung ari semua agensi bekaul meseti ditegap.

Nambah ke nya, iya ngemendar agih belanja RM5,000 dikena nyukung aktiviti Librari Mensia Mayuh Mukah taun baru.

Pengawa nya richah enggau mayuh aktiviti khas ungkup nembiak mit sereta pemandang servis librari seraya mekuh kaul entara agensi perintah enggau komuniti lokal. -EDISI UKAS