KUCHING: Malaysia bejalaika inisiatif mekuh kerejasama kuasa ba rantau Serakup Menua Asia Tenggara (ASEAN) nengah pengawa ngemanah Sempekat Pemereti Ati (MoU) Grid Kuasa ASEAN.
Sapit Menteri Besai, Datuk Amar Fadillah Yusof madah, Malaysia udah nempa rentayan kuasa begulai enggau tiga menua ASEAN iya nya Thailand, Singapura enggau Laos.
Ba sektor dagang kuasa, entara ti udah dipesetuju iya nya entara Malaysia enggau Vietnam sereta Sarawak enggau Singapura.
Berebak enggau nya, iya ngemerat pemesai guna grid kuasa tu nentuka pengawa jual-beli kuasa karan nyengkaum kuasa ulih dikena baru entara nengeri enggau menua.
“Kitai meseti ngemanah sistem grid ngambi semua kuasa ulih dikena baru ulih dipasuk dalam sistem lalu sama mega ba Sarawak, kitai meseti ngemanah grid tu ngambi kitai ulih berengkah nyual kuasa nya,” terang iya.
Iya nyebut jaku nya lebuh dirandau pemberita pengudah bejadi Program Malam Pesaka Budaya Bansa MADANI Gawa: Misyen Volunteer Siswa YSS-ASEAN Ke Sarawak 2025, dtu kena Hari Enam.
Ngena konsep enggau mekanisma sama, iya ti mega Menteri Idar Kuasa enggau Transfomasyen Ai andal ke nya ulih dikena ungkup kerejasama enggau menua ASEAN bukai nyengkaum Grid Borneo entara Sarawak enggau Kalimantan, Brunei Darussalam, Sabah lalu engka Filipina dudi hari.
“Nya kebuah, tu mih pekara ti deka diterang mekanisme nya ila tang chunto pemujur udah bisi iya nya entara Laos, Thailand, Malaysia enggau Singapura.
“Konsep tu ulih dikena ungkup semua menua ASEAN bukai,” terang iya.
Dulu ari nya, iya ngelalau raban ASEAN terus bekerejasama manah ba sektor kuasa tauka ekonomi seraya mai rantau tu nyadi entara ti pemadu kaya ba dunya. -EDISI UKAS
