KUCHING: Anugerah Festival Filem Antarabansa ASEAN (AIFFA) nyadi lambang penyerakup ASEAN sereta kelai ngerami pengelebih kreativiti serantau.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, AIFFA diatu majak mansang ngelui siti festival filem ti nyadi pelasar meransang kerejasama serantau enggau mandang industri ti ukai semina merindang bejuta mensia mayuh tang mega nyungkak ekonomi penyampau trilion.

Ku iya, Perintah Sarawak terus komited ngagai industri kreatif ti ulih ngubah runding, negu emosyen enggau nempa jematan entara budaya seraya ngentapka penuduk nengeri ba industri tu.

“Nengah Opis Menteri Dagang Temuai, Industri Kreatif enggau Seni Pemerindang, kitai terus meranak puku ba latih, pelajar enggau infrastruktur.

“Enda lama da, kitai deka numbuh Palan Seni Pemerindang kitai empu lalu netapka endur nya nyadi palan ngansah penau lokal sereta meransang pemansang kreatif Sarawak," ku iya.

Iya nyebut jaku nya nengah pemandang khas serimbai Malam Gala AIFFA ba siti hotel tebilang ditu kena Hari Enam.

Datuk Patinggi Abang Zohari mega nyemetak madah, inisiatif Perintah Sarawak ngambi semampai nyingkang ke mua sereya nempa pemansang ti deras agi ungkup rebak dudi.

Ku iya agi, penatai serikat penerebai AirBorneo taun baru deka nambahka agi konektiviti ngagai selampur Sarawak ti deka nyukung pemansang industri kreatif enggau dagang temuai nengeri.

Taun tu, AIFFA nerima rikod 200 filem nyeremin kaul serantau ti tegap.

Festival tu mega nyendia sekeda kategori anugerah baru nyengkaum ngaku nembiak universiti ASEAN ti ngasil filem pandak besuluka jaku Juluk Pemansang Meruan (SDG) sereta kategori ti ngerami produser dokumentari Borneo ti mai kisah budaya enggau komuniti lokal.

Sama datai iya nya Menteri Pemansang Indu, Ruang Bilik enggau Komuniti Dato’ Sri Nancy Shukri, Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah, bala Sapit Menteri Dagang Temuai, Industri Kreatif enggau Seni Pemerindang Datuk Snowdan Lawan enggau Datuk Sebastian Ting Chiew Yew sereta temuai dipebasa bukai. -EDISI UKAS

Pemberita: Alezxandria Kapple
Penyalin: Betrice Britney Dee
Gambar: Shahril Haqim