SADONG JAYA: Perintah Sarawak ransing ngaga jalai selampur menua tu dikena nentuka pemansang ulih diasai nengah chara ti inklusif, lebih agi rayat di kandang menua pesisir.
Sapit Menteri di Opis Premier Sarawak (Penyeraris Projek Agensi Kandang Menua, DBKU enggau Pekara Islam), Datuk Dr. Abdul Rahman Junaidi madah, pengawa ngaga infrastruktur nengah perintah ke dipegai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, diatu chakah dipejalai nyengkaum pengawa ngaga jalai ngelawa kandang menua ti ngelama tu semina ulih di lawa nengah sungai enggau jalai ti jauh.
“Sarawak nengeri pemadu besai di Malaysia lalu bisi rayat kala napi penusah ketegal nadai jalai, tang diatu perintah udah ngatur perambu ti komprehensif dikena nentuka semua kandang menua bisi jalai," ku iya.
Iya madah munyi nya maya bejadi Pengawa Nutup Program Hari Begulai Enggau Rayat Zon 4 Rangawan ke diatur Unit Komunikasi Awam Sarawak (UKAS) ditu, Hari Minggu.
Nambah ke jaku iya, Datuk Dr. Abdul Rahman madah, siti ari projek pemadu besai ke nyungkak pemansang, iya nya pengawa ngaga jalai baru 142 kilometer pemanjai di Baram, ke nengah kampung enggau paya, berengkah taun tu lalu disadang tembu dalam kandang empat taun.
“Enti tembu ila, projek tu disadang nyungkak pemansang ekonomi, akses servis rama sereta peluang pemansang rayat menua di Baram ,” ku iya seraya madah pengawa meranak puku ba projek nya bekenaka ungkus ti besai tang projek nya beguna ungkup Sarawak dudi hari.
Kelimpah ari nya, Datuk Dr. Abdul Rahman mega madah, pemansang nengeri semina ulih digaga enggau chara ti berurun enti sema penyerakup rayat dijaga, seriris enggau juluk ati perintah ke deka ngemansangka selampur nengeri Sarawak sebela sereta inklusif.
“Rayat Sarawak tebilang enggau rindu beserakup. Taja bebida bansa enggau budaya, kitai enda beserara. Tu nyadi pengelebih lalu tu beguna dikena ngerumban agenda pemansang nengeri,” ku iya nerang silik.
Maya nya mega, iya bela muji inisiatif UKAS ngatur program nabur penerang Perintah Sarawak ngagai rayat nengah ngabas rayat.
Pengerami sehari nya bela digulu Kaban Parlimen Batang Sadong Rodiyah Sapiee, Kaban Kunsil Nengeri (ADUN) Simunjan Awla Dris, Direktor UKAS Awang Putrayusrie Awang Redzuan, Pegawai Pelilih Asajaya Jerry Zannuddin Bidin, Chairman Gerempung Komuniti Zon 4 Rangawan Rafendy Ariffen enggau Temenggong Melayu Sitak Samarahan Chek Bujang.-EDISI UKAS
