KUCHING: Integriti enggau atur ti manah meruan nyadi lalau Perintah Sarawak nentu pemansang nengeri dipejalai enggau lurus, akauntabiliti sereta meri pemaik ngagai rayat lalu nyungkak pemujur nengeri ngelawa 2030.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengeransing ngemeran integriti enggau atur ti manah udah diperati kenyau 2017 lebuh iya berengkah megai perintah nengeri.
“Perintah GPS Sarawak ngemerat pemesai reti disiplin fiskal, integriti, atur perintah ti manah sereta pengawa ngenggai makai suap kenyau ari taun 2017 maya aku belabuh nyadi Premier Sarawak,” ku iya.
Iya madah munyi nya ba Hari Integriti Development Bank of Sarawak Bhd (DBOS) ditu, Hari Satu.
Nambah ke jaku iya, Datuk Patinggi Abang Zohari madah, ikrar integriti ti digaga enggau raban kabinet nyadi lalau ngambi seruran ingat ke tanggungpengawa nyaga pengelurus sereta likun ari ulah salah ngena kuasa.
Iya bela madah, Perintah Sarawak mega udah negap agenda integriti enggau nentu semua opis menteri, agensi, 'badan berkanun' enggau GLC bejalaika Organisational Anti-Corruption Plan (OACP), kelimpah bisi lebih 210 Pegawai Integriti Bertauliah (CeIOs) iya nya penyampau pemadu mayuh di Malaysia dikena nyaup mutar penanggul makai suap.
Kelimpah ari nya, ku iya, Unit Integriti enggau Ombudsman Sarawak (UNIONS) ti ditumbuh ba taun 2018, nyadi kelai pengeransing nengeri nyungkak sistem sebana mensia mayuh sereta pengawa matau, ditangkan ngaga Ordinan Ombudsman 2023 ti meri kuasa undang-undang dikena mansik sereta nisih penyikar pengawa ngenatai servis perintah.
Premier Sarawak madah, gaya atur ti lurus nyaup tikas pekara wang nengeri ti tegap, pengandal pemeranak puku sereta ngentap tikas kredit AAA ti konsisten ti mandangka iring tuai ngembuan integriti ngatur asil sereta reta nengeri.
Seriris agenda negap integriti nengeri, ku iya, DBOS ti mandangka pengeransing institusyen nya nerenak budaya kereja integriti bejalaika agenda pemansang nengeri.
Ba program nya, Premier Sarawak mega dipebasa meda pengawa ngelanchar Islamic Banking Window, ngelai siti agi pemujur besai DBOS ngerembai servis.
Sama datai Sapit Premier Sarawak Datuk Amar Douglas Uggah Embas, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nassar, Chairman Sarawak Information System (SAINS) Datuk Patinggi Tan Sri Dr. George Chan Hong Nam, Menteri Pemansang Indu, Nembiak Mit enggau Pengelantang Komuniti Dato Sri Fatimah Abdullah, Menteri Pengangkut Sarawak Dato Sri Sri Lee Kim Shin, Menteri di Opis Premier Sarawak Dato Sri John Sikie Tayai, Sapit Menteri Pelajar, Inovasyen enggau Pemansang Penau Datuk Francis Harden Hollis, Chairman DBOS Tan Sri Datuk Amar Mohamad Morshidi Abdul Ghani, Tuai Pegawai Eksekutif DBOS Datu Laura Lee Ngien Hion sereta temuai dipebasa ke bukai.-EDISI UKAS
