LIMBANG: Bazaar Krismas Tamu Medamit 2025 deka nyadi palan pematak ujung taun tu lebuh pengatur melaba penatai urung 10,000 pengusung sepemanjai dua hari ngatur Bazaar nya ari 5 enggau 6 Disember tu.
Chairman Kaunsil Pelilih Limbang (MDL), Kr Sufian Mohat madah, bisi 40 orang dagang deka ngambi bagi, nyengkaum orang dagang pemakai enggau utai irup, produk betanam betupi sereta jelu tupi, nyengkaum penyereta ari orang dagang Muslim.
Ku iya, bazaar nya ukai semina deka ngerichah pengerami ngintu Hari Krismas aja, tang nyadi nalan besai nyungkak ekonomi Pasar Medamit ari meri peluang peranak menua ngelaku asil produk sida.
“Bazaar tu sebagi ari program ti dianti laban semina tiga program besai diatur di Medamit taun tu.
"Kitai ngarap program tu ulih matak pengusung ari menua tu enggau luar Limbang, nyengkaum ari Brunei Darussalam,” ku iya.
Iya madah munyi nya ba aum media Bazaar Krismas Tamu Medamit 2025 ti diatur di Kaunsil Pelilih Limbang, Hari Dua.
Bemacham aktiviti narit ati diatur baka Pekit Dart, Pekit Miss Kebaya Christmas 2025, Pemerindang Artis, Pekit Ngelinsu Nembiak Mit, sereta Pekit Ngias Christmas Tree.
Komiti Tamu Medamit ti nyadi pengatur bela nambah manah dikena nentuka pengawa ngatur sekali tu richah agi ti dibanding taun dulu.
“Kelimpah aktiviti bejual, MDL mega deka muka kaunter mayar chukai dikena ngemuntangka pengawa mensia mayuh,” ku iya madah baru.
Iya bela meri terima kasih ngagai Komiti Tamu Medamit ke semak 10 taun bekerejasama enggau MDL ngatur aktiviti dagang di sitak nya.
Bazaar Krismas Tamu Medamit 2025 deka dipenyadi Sapit Menteri Pengangkut Malaysia ke mega Kaban Parlimen Limbang, Datuk Hasbi Habibollah enggau Kaban Kunsil Nengeri (ADUN) Batu Danau, Dato Paulus Palu Gumbang.
Sama datai ba aum media nya, Sekretari Kaunsil Pelilih Limbang, Michelle Hildalyne Jering Anthony Luta, Chairman Komiti Tamu Medamit, Rumai Sanggau, enggau Chairman Pengatur Bazaar Krismas Tamu Medamit 2025, Daniel Taha.-EDISI UKAS
