MIRI: Kaunsil Amanah Pengintu Pengelantang Masjid Nengeri Sarawak (LAKMNS) diatu nguasa nyau deka semua ekuiti di Lubuk Tiara Sdn. Bhd.

Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa nguasa semua ekuiti nya nangkan atur baru sereta ngempu ladang nya ari Rimbunan Hijau sebedau tu.

"Apin lama, kitai udah ngadu baru atur kompeni tu. Ke alai LAKMNS bisi penguntung ba kompeni tu. Lalu diatu sida udah ngempu ekuiti ari RH.

"Reti nya, semua pengawa kompeni tu ari baruh Lubuk Tiara. Reti iya, ekuiti nyau deka 100 peratus dikuasa kaunsil tu,” ku iya.

Iya madah munyi nya ba aum media serimbai penemuai gawa ke Lubuk Tiara Sdn. Bhd ditu, Hari Tiga.

Berebak enggau nya, Datuk Patinggi Abang Zohari madah, bisi sekeda langgur udah dibantai dikena ngadu macham penatai pemisi kompeni nya ti bela meri pemaik ngagai rayat kelebih agi ngagai peranak menua semak ditu.

"Ukai semina merati ke pengawa sawit aja tang mega pengawa bukai ti tau ngeluarka kereban bukai baka biomass, nanam pun kayu bukai sereta pemansut ekonomi gadung sereta ekonomi idar.

"Kitai ulih bekenaka kereban teda ari sawit dikena ngasilka pemakai jelu tupi,” ku iya.

Ku iya, inisiatif nya deka mantu peranak menua ke semak bulih penatai pemisi ari dagang jelu tupi.

Sama datai, Sekretari Perintah Sarawak, Datuk Amar Mohamad Abu Bakar Marzuki, Sapit Menteri Pelajar, Inovasyen enggau Pemansang Penau, Datuk Dr Annuar Rapaee, Sapit Menteri Pengerai Mensia Mayuh, Pengawa Berumah enggau Perintah Lokal, Datuk Dr. Penguang Manggil, Residen Bagi Menua Miri, Galong Luang enggau Direktor Atur Lubuk Tiara Sdn. Bhd, Kaunselor Drahman Jaladin. - EDISI UKAS