BELAGA: Kaban Kunsil Nengeri (ADUN) Murum, Kennedy Chukpai Ugon bisi ngatur pejalai ngabas pengawa nyeruri rentayan jalai batang lama di menua ulu Murum.

Siti penerang ba Facebook Palan Sevis ADUN Murum, tuju pejalai nya diatur berati ke pengawa ngadu ke jalai batang lama nuju Lusong Laku sereta jalai ke Long Lawen enggau Tegulang.

Nyempulang iya Injinir Bagi Menua Opis Kereja Raya (JKR) Kapit Ir Ts Jawa Gara enggau pengari Pegawai Pelilih Belaga Jupitar Janin.

Ku Kennedy, asil pejalai nya dia sida meda jalai akses ke Lusong Laku diatu udah ulih ditengah pengudah diseleti, seraya sekeda komponen projek bukai agi digaga nentuka semua jalai nya nyapai standard ti likun enggau lantang ditengah peranak.

Iya mega meri terima kasih ngagai Komiti Penyangga Penusah Pelilih Belaga/Bagi Menua Kapit, JKR Pelilih Belaga/Bagi Menua Kapit, sereta semua bakih strategik ti ransing nentuka rentayan jalai penyambung di menua ulu kelebih agi pengawa ngadu baru jalai batang di Murum ulih tembu menyana ngambi rumah panjai enggau genturung pendiau komuniti menua pesisir disambung jalai meruan.

Projek nyeruri nya deka terus dipatau rat nentuka tetiap renggat projek digaga nitih taga ungkup pengelantang timpuh panjai komuniti Murum. -EDISI UKAS