Cert 2.0 Kluster Penusah Angus Nanga Ngungun Nyadi Model Besikap Napi Penusah Menua Pesisir
KANOWIT: Sitak Nanga Ngungun ti suah betapi enggau penusah angus kelebih agi ba rumah panjai, diatu bisi ‘terabai komuniti’ sida empu ari numbuh ke Tim Community Emergency Response Team (CERT) 2.0 Kluster Penusah Angus, siti inisiatif beguna ti dikeandal ulih ngubah chara komuniti menua pesisir napi penusah ngenyit.
Kaban Kunsil Nengeri (ADUN) Ngemah, Anyi Jana madah, tim nya ukai semina raban voluntia aja, tang mega raban terubah ti datai ngesah penusah ti disikap ngena penemu enggau pengelandik ngambi empas penusah enda balat sebedau raban penyelamat profesional datai.
“Program tu strategik endar nentuka komuniti udah besikap napi penusah,” ku iya lebuh ngelancharka CERT 2.0 Kluster Penusah Angus ditu, Hari Dua.
Ku Anyi, tim CERT deka belajar ke modul latih nyerangkung semua pekara ti mungkur teori enggau praktikal nyengkaum teknik ngerara api, ngena portable fire pump, mantu orang tasah, bantu imijensi enggau simulasyen penusah ngenyit.
Program nya ku iya, seriris enggau pengawa Perintah Sarawak nempa komuniti ti ulih beretan napi ubah klimet enggau pemar rampa menua.
Berindik ari nya, Anyi ngarap ke bala penyereta nyadi ejen ubah enggau ngerembaika penemu ngagai peranak bukai sereta nentuka kereban enggau pelin atur penusah seruran besikap.
Ngeleda ke asil enggau pemesai guna program nya, Anyi merambu program CERT dikerembai ngagai sitak bukai di Pelilih Kanowit ti bela tau dituntung penusah angus enggau bah.
“Enti mayuh agi komuniti dilatih, kitai ulih numbuh rentayan komuniti sikar mutar penusah lalu ngangkatka Kanowit nyadi siti pelilih ti likun, lantang enggau ulih beretan,” ku iya.
Sama datai, Tuai Penulung Direktor ngari ke Direktor Unit Pengelikun enggau Penerit Adat Sarawak (UKPS) Paul Khiu Khon Chian, Tuai Polis Pelilih Kanowit DSP Junical Ujal, pengari PETRONAS Sarawak Violet Tay Suan Boon enggau pengari Pegawai Pelilih Kanowit Clinton Jelai. -EDISI UKAS
