BINTULU: Projek nyeruri jalai bedarat nyambung PPR Bandaria Park ke Sekula Primari (SK) Ulu Segan deka ngelantangka lebih 60 peratus nembiak sekula nya.

Pegawai Khas Kaban Kunsil Nengeri (ADUN) Jepak, Shahrezy Sulaiman madah, projek digaga nengah Program Transformasyen Menua Pesisir (RTP) nya mungkur pengawa ngaga perabung enggau langkau nganti nentuka pengelikun enggau pengelantang nembiak berundang ke sekula.

“Kitai udah ngabas projek RTP ti ngaul pengawa ngaga perabung jalai bedarat ti nyambung Bandaria Park ke SK Ulu Segan.

“Perengkaguna tu beguna endar nentuka nembiak nadai basah berujan sereta nyeliah sida ari labuh ngerantar,” ku iya lebuh dirandau pengudah ngabas taba projek, Hari Tiga.

Iya mega madah, sekeda komponen tambah dilanggur ngambi agih belanja ti diberi ulih meri pemaik.

“Kitai nambah mimit projek dibanding pelin asal nyengkaum perabung nuju jalai pagar ba mua,” ku iya.

Projek beungkus RM200,000 nya disadang meri empas terus ngagai nembiak SK Ulu Segan, kelebih agi sida ti bedarat ari Bandaria Park.

Shahrezy ngarap ke projek nya ulih tembu nitih taga lalu nyendiaka jalai ti lantang enggau likun agi ditengah bala nembiak berundang ke sekula.-EDISI UKAS