BELAGA: Senator Michael Mujah Lihan ngemendarka agih belanja RM25,000 ngagai peranak Uma Balui Ukap di Sungai Asap ditu.

Ku iya, RM10,000 ari penyampau nya diberi ngagai Komiti Pemansang enggau Pengelikun Genturung Pendiau (JKKK) Uma Balui Ukap, seraya RM5,000 ngagai Biro Indu.

“Kelimpah ari nya, RM10,000 da dikena mantu nirika ‘Bato Kalo’, kelai ngingatka genturung pendiau lama lebuh agi diau mendam di Ulu Balui ti deka diberi nengah agih belanja taun baru,” terag iya.

Iya nerang pekara nya ba mua mayuh rambau Pengerami Ngintu Genap Taun Ke-26 Genturung Pendiau Uma Balui Ukap, ditu, Hari Dua.

Ngenang program nya, iya madah nya meri awak ngagai komuniti berati ke pejalai ti diasai sida, ngenang jasa enggau pemanah pengawa rebak dulu sereta merambu pengidup menyana dudi hari.

Berebak enggau nya, iya meransang peranak terus ransing ngangkatka tikas idup ruang bilik ari neladan pemujur sida ti bagas gawa ngemansangka pengawa betanam betupi, kelebih agi sawit ti nyadi batang penatai pemisi ba menua nya.

Sama datai, Pegawai Tadbir Nguasa Opis Pelilih Mit Sungai Asap Sylvester George sereta bala Tuai Raban Bansa enggau Tuai Komuniti (KMKK). -EDISI UKAS